Chhagan Bhujbal : छगन भुजबळांची राजकीय कोंडी? लासलगाव बाजार समितीत आता सासऱ्यांना सुनेचेच आव्हान

Nashik News, 10 Aug : राज्याच्या आणि देशाच्या राजकारणात कांदा नेहमीच अडचण करीत असतो. आता मंत्री छगन भुजबळ यांची कांद्याने राजकीय कोंडी केली आहे. भुजबळ समर्थकांनीच परस्परांना आव्हान दिल्याने ही स्थिती उद्भवली आहे.

आशिया खंडातील सर्वात मोठी बाजारपेठ म्हणून लासलगाव बाजार समिती ओळखली जाते. राज्याचे अन्न व नागरी पुरवठा मंत्री छगन भुजबळ यांच्या मतदारसंघात ती आहे. सध्या या समितीत दोन्ही गट भुजबळ यांना मानणारे आहेत. भुजबळ यांनी यापूर्वी दोन्ही गटांमध्ये समझोता घडवून बाळासाहेब शिरसागर आणि त्यानंतर डिके जगताप यांना चेअरमन केले होते. मात्र जगताप यांच्या कारकीर्दीत संचालकांना विश्वासात घेतले नाही, असा आरोप होत आहे.

सध्या अध्यक्षपदाच्या निवडणुकीसाठी भुजबळ समर्थक दोन गटात विभागले आहे. त्यामध्ये पंढरीनाथ थोरे आणि बाळासाहेब क्षीरसागर यांच्या गटाने अध्यक्षपदासाठी मॅजिक फिगर असल्याचा दावा केला आहे. त्यातूनच या गटांमध्ये फुट पडली आहे. यापूर्वी झालेल्या अध्यक्षपदाच्या निवडणुकीत ऐनवेळी मोठे नाट्य घडले. निवडणुकीच्या काही मिनिटे आधी निर्णय अधिकारी प्रकृती बरी नसल्याने निघून गेले.

त्यामुळे रखडलेली निवडणूक कधी घ्यावी याचा निर्णय उद्या (ता.११) होणार आहे. सध्या जगताप आणि त्यांच्या संचालकांतील नाराजीमुळे काही संचालक विरोधी गटाच्या संपर्कात आहेत. त्यामध्ये जयदत्त होळकर हे सत्ताधारी पदाकडून अध्यक्षपदासाठी इच्छुक असून ते मंत्री भुजबळ यांचे समर्थक आहेत.

जयदत्त होळकर यांच्या विरोधात बाळासाहेब शिरसागर आणि पंढरीनाथ थोरे यांनी जोरदार फिल्डिंग लावली आहे. या गटाकडे बहुमताची संख्या असून त्यांनी जयदत्त होळकर यांच्या सून सोनिया होळकर यांनाच अध्यक्षपदासाठी पुढे केले आहे. सासरे आणि सून यांच्यात लासलगाव बाजार समितीच्या अब्जावधी रुपयांची उलाढाल असलेल्या संस्थेवर वर्चस्वासाठी संघर्ष होऊ घातला आहे. मंत्री भुजबळ यांचे समर्थक आहेत. त्यामुळे कोणत्या गटाला आशीर्वाद द्यावा अशी अडचण मंत्री भुजबळ यांची झाली आहे.

लासलगाव बाजार समितीचे सत्तेचे गणित आणि त्यातील आर्थिक उलाढाल यामुळे अध्यक्षपदाची निवडणूक फक्त प्रतिष्ठेची नव्हे तर राजकीय वर्चस्वाची बनली आहे. त्यात लढणारे दोन्ही गट आपलेच असल्याने भुजबळ यांनी घटस्थ राहण्याची भूमिका घेतली आहे. ही भूमिका शेवटपर्यंत टिकणार की शेवटच्या क्षणी भुजबळ सासरे की सून यांच्या पारड्यात आपले राजकीय वजन टाकतात याची उत्सुकता आहे.