Maharashtra Politics : महाराष्ट्रातील महापौरपदाचा पहिला उमेदवार जाहीर, ओवेसींची मोठी घोषणा

Maharashtra Politics : राज्यातील 29 महानगरपालिकांसाठी 15 जानेवारी 2026 रोजी मतदान होणार आहे. तर १६ जानेवारील मतमोजणी होऊन निकाल लागणार आहे. अशातच निवडणूक प्रचार आता अंतिम टप्प्यात आला असताना महाराष्ट्रातील महापौरपदाचा पहिला उमेदवार जाहीर करण्यात आला आहे.

मालेगाव महापालिकेत एमआयएमचे राष्ट्रीय अध्यक्ष खासदार असदुद्दीन ओवेसी यांनी थेट महापौरपदाचे उमेदवार म्हणून माजी महापौर अब्दुल मलिक युनूस इसा यांच्या नावाची घोषणा केली. महापालिका निवडणुकीच्या पार्श्वभूमीवर मालेगावात ‘एमआयएम’ उमेदवारांच्या प्रचारासाठी शुक्रवारी (ता. ९) झालेल्या जाहीर सभेत ते बोलत होते. यावेळी त्यांनी महापौरपदाचा उमेदवार जाहीर करतानाच त्यांच्या माध्यमातून शहराचा विकास केला जाणार असल्याचे आश्वासन दिले.

मालेगावच्या सर्वांगीण विकासासाठी जनतेने ‘एमआयएम’ला साथ द्यावी. पक्षाची सत्ता आल्यास अब्दुल मलिक यांना महापौर केले जाईल अशी घोषणा त्यांनी केली तसेच भ्रष्टाचाराला मूठमाती दिली जाईल, अशी ठाम ग्वाही त्यांनी दिली.

राज्यातील 29 महानगरपालिकांसाठी १५ तारखेला मतदान होणार असून आता प्रचार सुरु आहे. अद्याप कोणत्याही महानगरपालिकेत कोणत्याही पक्षाने थेट महापौर पदाची घोषणा केलेली नाही. पहिली घोषणा ही मालेगावातून झाली आहे. महाराष्ट्रात पहिल्यांदाच महापौरपदाचा उमेदवार जाहीर झाला तो मालेगावातून जाहीर झाला आहे.

राज्यात सत्तेत असलेले महायुतीतील नेते महापालिका निवडणुकांमध्ये वेगवेगळ्या पद्धतीने लढत जनतेची सरळसरळ दिशाभूल करीत असल्याचा आरोप खासदार असदुद्दीद्दिन ओवैसी यांनी केला. मालेगाव येथे इस्लाम पक्षाचे प्रमुख व माजी आमदार आसिफ शेख हे उपमुख्यमंत्री अजित पवार यांच्या इशाऱ्यावर निवडणूक लढवत असल्याचा गंभीर आरोप त्यांनी केला.

मालेगाव महापालिकेच्या २१ प्रभागांतून ८४ नगरसेवक निवडून दिले जाणार आहेत. प्रभाग ६ ब मधून इस्लाम पार्टीच्या महिला उमेदवार बिनविरोध निवडून आल्या आहेत. उर्वरित ८३ जागांसाठी चुरशीच्या लढती होत आहेत. बहुतांशी ठिकाणी दुरंगी लढती होत असून, काही प्रभागांमध्ये तिरंगी सामना रंगला आहे. ८३ जागांसाठी ३०० उमेदवार रिंगणात असून, जवळपास सर्वच उमेदवारांनी घरोघरी जाऊन प्रचारपत्रके वाटण्यावर भर दिला आहे.