Mosam River Pollution : ड्रोन, पोलीस बंदोबस्त, जिल्हाधिकाऱ्यांचा इशारा तरीही ईदनंतर मालेगावची मौसम नदी पुन्हा लाल! 3 अधिकारी निलंबित

Malegaon News, 29 May : अवैध कत्तलखाने हा मालेगाव शहराचा गंभीर प्रश्न बनला आहे. गेल्या आठवड्यात मौसम नदीत रक्तमिश्रित पाणी वाहिले होते. त्याच्या तीव्र प्रतिक्रिया उमटल्या होत्या. शहरातील अवैध कत्तलखान्यांमुळे नदीत थेट रक्तमिश्रित पाणी मिसळते. गेल्या आठवड्यात त्यावरून नागरिकांनी तीव्र आंदोलन केले होते.

या पार्श्वभूमीवर बकरी ईदसाठी जिल्हाधिकारी आयुष प्रसाद यांनी विशेष दक्षता बाळगण्याच्या सूचना दिल्या होत्या. महापालिका प्रशासनाने वाढीव कत्तलखाने सुरू केले होते. पोलिसांनी शहरभर बंदोबस्त तैनात करून अवैध कत्तल थांबविण्याची व्यवस्था केली होती.

मालेगाव शहरातील बकरी ईदच्या पार्श्वभूमीवर अवैध कत्तल रोखण्याचे मोठे आव्हान होते. यासाठी शहरभर पोलिसांनी ड्रोन सोडले होते. या कडे कोट बंदोबस्तानंतरही समस्या सुटली नाही. बकरी ईदच्या कत्तलीमुळे गटारिंतून रक्त मिश्रित पाणी थेट मौसम नदीत मिसळले. मौसम नदीतून हे पाणी गिरणा नदी द्वारे परिसरातील पिण्याच्या पाण्याचे स्त्रोत प्रदूषित करते. त्यामुळे नागरिकांमध्ये त्याच्या तीव्र प्रतिक्रिया उमटल्या.

गेल्या आठवड्यात या विरोधात सामाजिक कार्यकर्ते रामदास बोरसे यांनी उपोषण केले होते. काल पुन्हा मौसम नदी लाल झाल्याने नागरिक संतापले. सार्वजनिक नागरी सुविधा समितीचे बोरसे यांनी पुन्हा आंदोलन केले. त्याला मालेगावकर विधायक संघर्ष समितीचे निखिल पवार, देवा पाटील, मराठा महासंघाचे भरत पाटील, मच्छिंद्र शिर्के यांसह विविध नेत्यांनी पाठिंबा दिला.

मालेगाव शहरातील मौसम नदीचे प्रदूषण हा राजकीय मुद्दा बनला आहे. जिल्हाधिकारी प्रसाद यांनी गेल्याच आठवड्यात त्याची गंभीर दखल घेतली होती. त्यामुळे काल प्रशासनाने कठोर भूमिका घेत चौकशीचे आदेश दिले. महापालिकेचे शहर अभियंता कैलास बच्छाव, स्वच्छता विभागाचे सहाय्यक आयुक्त अनिल पारखे, प्रभाग अधिकारी श्याम बुरकुल या तीन वरिष्ठ अधिकाऱ्यांना तातडीने निलंबित करण्यात आले.