Devendra Fadnavis : मराठ्याचं वादळ पोहचलं, आता आदिवासीचं बिऱ्हाड मुंबई गाठण्याच्या तयारीत; फडणवीसांची मोठी कोंडी

Devendra Fadnavis : मराठा समाजाला ओबीसी प्रवर्गातून आरक्षण दिलं जावं या मागणीसाठी मनोज जरांगे पाटील यांनी पुन्हा एकदा आंदोलन पुकारलं आहे. जरांगे यांच्या नेतृत्वात राज्याच्या कानाकोपऱ्यातील मराठा बांधव मुंबईच्या आझाद मैदानात दाखल झाले आहेत.

आझाद मैदानावर जरांगे पाटील यांनी उपोषण सुरु केलं आहे. राज्य शासनाने आझाद मैदानावर उपोषणासाठी एक दिवसाची परवानगी दिली आहे. परंतु सरकारने आता गोळ्या घातल्या तरी मागे हटणार नाही. डोक्यावर गुलाल पडल्याशिवाय आता मुंबई सोडणार नाही असं जरांगे पाटील यांनी म्हटलं आहे.

जरांगे पाटील यांनी या आंदोलनाच्या सुरुवातीपासून मुख्यमंत्री देवेंद्र फडणवीस यांनाच लक्ष्य केलेलं आहे. विनाकारण मराठा विरोधी भूमिका सोडून द्या, अन्यथा पुढच्या येणाऱ्या दिवसांत तुमचं राजकीय करिअर बरबाद होईल असा इशाराच जरांगेंनी फडणवीसांना दिला आहे.

तर दुसरीकडे नाशिक शहरात ५२ दिवसांपासून आदिवासी बांधवांचे आयुक्तालयासमोर बिऱ्हाड आंदोलन सुरू आहे. आंदोलक काही केल्या मागे हटायला तयार नाही. आदिवासी विकास विभागातील बाह्यस्त्रोतांद्वारे होणारी भरती थांबवावी, या मागणीसाठी हे आंदोलन सुरु आहे. आंदोलकांनी यापूर्वी मुख्यमंत्री देवेंद्र फडणवीस तसेच आदिवासी विकास मंत्री प्रा. अशोक उईके यांची भेट घेतली होती. मात्र, अद्याप ठोस तोडगा निघालेला नाही.

५२ दिवस झाले आंदोलन सुरु आहे, मात्र तोडगा न निघाल्याने व होत असलेल्या विलंबामुळे आंदोलकांनी वारंवार आपला रोष व्यक्त केला. आयुक्तालयासमोर निदर्शनेही केली. तरी प्रश्न सुटलेला नाही. रोजंदारी कर्मचारी आजही ठिय्या मांडून बसले आहेत. बिऱ्हाड आंदोलनावर तोडगा काढण्यासाठी आदिवासी समाजाचे आमदार आज शुक्रवार (दि. २९) मुख्यमंत्री देवेंद्र फडणवीस यांची भेट घेणार आहे. त्यामुळे काय निर्णय होतो यावर आंदोलकांच्या नजरा आहेत.

परंतु आमदारांच्या पातळीवरही समाधानकारक तोडगा निघाला नाही, तर बिऱ्हाड आंदोलक मुंबई गाठण्याच्या तयारीत आहेत, अशी माहिती ललित चौधरी यांनी दिली. त्यामुळे मराठ्यांपाठोपाठ आदिवासीही मुंबई गाठण्याच्या तयारीत असल्याने फडणवीसांची मोठी कसोटी लागली आहे. दोन्हीकडून फडणवीसांची कोंडी होऊ शकते.