MD Drugs Crime: निवडणुका संपल्या, ड्रग्ज मुक्त महाराष्ट्राचे काय? पुन्हा सुरू झाले एमडी ड्रग्सचे राज्यभर थैमान!

Drug Free Maharashtra Campaign: लोकसभा निवडणुकीदरम्यान एमडी ड्रग्स आणि त्याचा राजकीय नेत्यांशी संबंध यावर जोरदार राजकीय आरोग्य प्रत्यारोप झाले होते. यासंदर्भात सत्ताधारी पक्षाच्या मंत्र्यावरही गंभीर आरोप झाला होता. आता हे आरोप थांबले मात्र ड्रग्सचे थैमान राज्यभर सुरूच आहे.

श्रीरामपूर येथे एमआयडीसी पोलिसांनी कारवाई करून १३ कोटींचा ड्रग्स साठा जप्त केला आहे. संदर्भात पोलीस निरीक्षक नितीन देशमुख यांनी मिनीनाथ विष्णू राशिनकर आणि विश्वनाथ कारभारी शिंपणकर या दोघांना अटक केली आहे. विरोधात गुन्हा दाखल करण्यात आला आहे.

अहिल्यानगर जिल्ह्यात एवढ्या मोठ्या प्रमाणावर ड्रग्जचा साठा पहिल्यांदाच आढळला आहे. दोन दिवसांपूर्वी नाशिक शहरात दोन युवकांना अटक करण्यात आली. तिच्याकडे दोन लाख रुपयांचे एमडी ड्रग्स आढळले. आधी धुळे आणि जळगाव येथे अशीच कारवाई करण्यात आली होती.

ऑक्टोबर २०२३ मध्ये शिंदे (नाशिक) येथील एका कारखान्यावर मुंबई पोलिसांनी कारवाई केली होती. त्यात तीनशे कोटी रुपयांचा एमडी ड्रग्स साठा आढळला. या प्रकरणी ललित पाटील आणि त्याचे दोन सहकारी भूषण पाटील आणि अभिषेक बलकवडे यांना उत्तर प्रदेशातून अटक करण्यात आली होती. या प्रकरणाने राज्यभर एकच खळबळ उडाली होती.

या प्रकरणाचा मास्टर माइंड ललित पाटील हा शिक्षेत असतानाही पुण्याच्या ससून रुग्णालयात अनेक दिवस राजेशाही थाटात राहत होता. येथूनच त्याने पोलिसांच्या ताब्यातून पलायन केले होते. यासंदर्भात नाशिकशी संबंधित आणि मुख्यमंत्री एकनाथ शिंदे यांच्या पक्षाच्या एका मंत्र्यावर थेट आरोप करण्यात आले होते.

ड्रग्ज प्रकरणातील गुन्हेगार ललित पाटील याला शिवसेनेत प्रवेश मिळावा यासाठी नाशिकच्या एका मंत्र्याने प्रयत्न केल्याचे बोलले जाते. ससून रुग्णालयात बडदास्त आणि पळून जाण्यातही या मंत्र्याचे नाव घेतले जात होते. त्यामुळे लोकसभा निवडणुकीत शिवसेना उद्धव ठाकरे पक्षाकडून महायुती सरकारला आरोपीच्या पिंजऱ्यात उभे करण्यात आले होते.

शिवसेना नेते संजय राऊत यांनी याबाबत निवडणुकीदरम्यान जोरदार मोहीम उघडली होती. निवडणुका संपल्यावर राजकीय मोहीम थांबली आहे. मात्र राज्यभर एमडी ट्रकचे थैमान सुरूच आहे. या संदर्भात नागपूर, धुळे, जळगाव, नाशिक, भिवंडी आदी शहरातून एमडी ड्रग्सचा व्यवसाय होत असल्याने कारवाई करण्यात आले आहेत.

लोकसभा आणि विधानसभा निवडणुकीत ड्रग्स मुक्त महाराष्ट्र अशी घोषणा करणारे राजकीय पक्ष निवडणुका संपल्यावर शांत झाले आहेत. पोलीसही याबाबत फारसे गंभीर नसल्याने त्याची चर्चा होत नाही. युवा पिढीला एम डी ड्रगचा विळखा अधिक घट्ट होऊ लागला आहे. यावर राजकीय नेते तोंड उघडणार का? असा प्रश्न आहे.