Chhagan Bhujbal Politics: छगन भुजबळांच्या वाढदिवसानिमित्त ग्रंथालये होणार समृद्ध!

Chhagan Bhujbal News: राज्याचे अन्न व नागरी पुरवठा मंत्री छगन भुजबळ यांचा ७९ वा वाढदिवस नुकताच साजरा होणार आहे. राज्यातील अतिवृष्टीच्या पार्श्वभूमीवर तो साधेपणाने होईल. यावेळी समर्थकांनी त्यांना पुस्तके देण्याचे आवाहन त्यांनी केले.

वाढदिवसानिमित्त मिळालेली पुस्तके संस्थांना देण्याचा निर्णय मंत्री छगन भुजबळ यांनी घेतला आहे. त्यामुळे त्यांच्या वाढदिवसानिमित्त वाचन संस्कृतीला प्रोत्साहन मिळेल.मंत्री भुजबळ यांनी याबाबत स्वतः माहिती दिली.

राज्याचे अन्न,नागरी पुरवठा व ग्राहक संरक्षण मंत्री छगन भुजबळ यांचा १५ ऑक्टोबरला ७९ वा वाढदिवस नाशिक येथे हा साधेपणाने साजरा होणार आहे. त्यांच्या वाढदिवसाच्या निमित्ताने वाचन संस्कृतीच्या जनजागृतीसाठी ज्ञानाच्या भेटीचा उत्सव साजरा करण्यात येणार आहे.

या वाढदिवसानिमित्त भुजबळ फार्म कार्यालय, नाशिक येथे सकाळी ९ ते दुपारी २ या वेळेत कार्यकर्ते, पदाधिकारी आणि शुभेच्छुकांची भेट घेऊन सदिच्छा स्वीकारणार आहेत. परंतु यंदाचा वाढदिवस हा केवळ शुभेच्छांचा कार्यक्रम नसून ज्ञान आणि संस्कारांचा उत्सव ठरणार आहे.

नुकताच ९ ऑक्टोबरला माजी खासदार समीर भुजबळ यांच्या वाढदिवसाच्या निमित्ताने शुभेच्छुकांनी पारंपरिक भेटवस्तूंऐवजी पुस्तके भेट देण्याचा उपक्रम मोठ्या उत्साहात साजरा केला. त्या वेळी विविध विषयांवरील शेकडो पुस्तके जमा झाली आणि त्यातून एक समृद्ध साहित्यसंग्रह तयार झाला.

त्यानुसार मंत्री भुजबळ यांचा यंदाचा वाढदिवस हा उपक्रम पुढे नेण्याचा निर्णय घेतला आहे. त्यामुळे फुलांचा गुच्छ किंवा शाल न आणता पुस्तक भेट म्हणून द्यावी असे आवाहन मंत्री छगन भुजबळ यांच्या कार्यालयाच्या वतीने करण्यात येत आहे.

या पुस्तक भेट उपक्रमातून जमा होणारी सर्व पुस्तके ग्रामीण भागातील वाचनालयांना भेट देण्यात येणार आहेत. अनेक ग्रामीण तरुणाईला, विद्यार्थी वर्गाला आणि वाचनप्रिय समाजघटकांना त्यामुळे ज्ञानाचे नवे दरवाजे उघडतील. आजच्या काळात मोबाईलच्या पडद्यावर अडकलेले मन पुन्हा एकदा पुस्तकांच्या पानांकडे वळावे, वाचनातून विचार आणि विचारातून परिवर्तन घडावे हाच या उपक्रमामागचा खरा हेतू आहे.

-------