Bachchu kadu News : दिव्यांगांना स्वावलंबी बनविण्यासाठीच माझे राजकारण!

Prahar Sanghtana News : मी सध्या दिव्यांगासाठी सुरू केलेल्या योजनांच्या अंमलबजावणीसाठी दौरा करीत आहे. दिव्यांगांना विश्वास आणि स्वयंपूर्ण बनविणे यावर मी लक्ष केंद्रीत केले आहेत. त्यासाठीच माझे राजकारण आहे, असे माजी मंत्री बच्चू कडू यांनी `सरकारनामा`ला सांगितले.

आमदार बच्चू कडू (Bachchu kadu) यांनी नुकताच नाशिक, (Nashik) धुळे, (Dhule) नंदूरबारसह विविध भागांचा दौरा केला. यावेळी त्यांनी दिव्यांगासाठी विविध व्यक्तीगत लाभाच्या योजनेतील वस्तूंचे वाटप केले.

सिन्नर येथे आमदार कडू यांच्या उपस्थितीत दिव्यांगांचा मेळावा झाला. यावेळी त्यांनी आपल्या दौऱ्याची माहिती दिली. सिन्नर दिव्यांग कमिटीला आदर्श प्रहार भूषण पुरस्कार मिळाल्याची बाब अभिमानास्पद आहे. प्रत्येक दिव्यांग बांधव स्वाभिमानी व स्वावलंबी बनविण्यासाठी आपले प्रयत्न आहेत, असे सांगितले.

पुरवठा विभागाने दिव्यांगासाठी पत्रिका तयार केल्या होत्या. संजय गांधी योजनेची १०० प्रकरणे मंजूर झाल्याची माहिती संघटनेने दिली. तालुक्यात ५ टक्के निधी दिव्यांगांना वाटप केल्याचे सांगण्यात आले. आमदार कडू यांचे ढोलताशांच्या गजरात स्वागत करण्यात आले.

ते म्हणाले, दिव्यांगांसाठी अतिरिक्त अन्नधान्याचा लाभ मिळावा, यासाठी मंत्री छगन भुजबळ यांच्यासोबत बोलणे झाले असून, त्यासाठी प्रयत्न सुरू असल्याचे आमदार कडू यांनी सांगितले. दिव्यांगांसाठी स्वतंत्र घरकुल योजना असावी, यासाठी मुख्यमंत्र्यांसोबत बोलणे झाल्याचे ते म्हणाले. दिव्यांगासाठी अनेक योजना व कायदे आहेत. दिव्यांगांच्या लाभासाठी निधी कमी पडणार नाही याचा मला विश्वास आहे.

यावेळी माजी आमदार राजाभाऊ वाजे, सीमंतिनी कोकाटे, भाजपचे तालुकाध्यक्ष भाऊसाहेब शिंदे, तालुका प्रभारी जयंत आव्हाड, माजी नगराध्यक्ष विठ्ठलराजे उगले, प्रहारचे जिल्हाध्यक्ष शरद शिंदे, प्रहार दिव्यांग संघटनेचे राज्याध्यक्ष बापूराव कान्हे, कामगार संघटनेचे जिल्हाध्यक्ष ज्ञानेश्वर ढोली, राज्य समन्वयक संध्या जाधव, नायब तहसीलदार वराडे आदी उपस्थित होते.