Girish Mahajan : तीन मिनिटांच्या भाषणात गिरीश महाजन गरजले, थेट शरद पवारांनाच दिले चॅलेंज!

Nashik News : मुख्यमंत्री देवेंद्र फडणवीस यांनी आज नाशिक महापालिका निवडणुकीसाठी जोरदार बॅटिंग केली. मात्र या सभेत जलसंपदा मंत्री गिरीश महाजन यांनी तीन मिनिटात षटकार मारला. मंत्री महाजन यांनी भाजप पुढे कोणीही टिकणार नाही असे सांगितले.

यावेळी महाजन यांनी राष्ट्रवादी काँग्रेसचे नेते शरद पवार यांना थेट आव्हान दिले. शरद पवार यांचा पक्ष प्रभावहीन झाला आहे. जनता त्यांच्यासोबत नाही. त्यामुळे या निवडणुकीत त्यांचे अस्तित्व दिसणारच नाही.

शरद पवार यांना राज्याच्या राजकारणात आपल्या प्रभाव आहे असे वाटत असेल. मात्र माझे आव्हान आहे की, शरद पवार यांनी राज्यातील एक तरी महापालिका जिंकून दाखवावी. शरद पवार यांना ते शक्यच नाही.

आजच्या स्थितीत राज्यात सगळीकडे भाजपला प्रचंड मोठा प्रतिसाद मिळत आहे. जनता भाजप बरोबर आहे. त्यामुळे नाशिक महापालिकेत आपल्याला कुठल्याही परिस्थितीत सेंचुरी मारायचीच आहे.

नाशिक शहरात आपले शंभरहून अधिक नगरसेवक निवडून येतील याचा पुनरुचार त्यांनी केला. दिल्लीपासून गल्लीपर्यंत सरकार असेल तर विकासाची गाडी थांबू शकत नाही. त्यामुळे मतदारांनी यावेळी ठाम निर्णय घ्यावा.

केंद्रात पंतप्रधान नरेंद्र मोदी आणि राज्यात मुख्यमंत्री देवेंद्र फडणवीस यांचे सरकार आहे. नाशिक शहरात भाजपचा महापौर झाला की शहराचा विकास आणि चेहरा मोहरा बदलून जाईल. या शहराचा कायापालट आपल्याला करायचा आहे.

काही लोक येऊन जातात. भाषणे करतात. मात्र अशा बोल घेवड्या लोकांच्या हाती काहीही नसते. त्यामुळे मतदारांनी त्यांना फसू नये. या शब्दात त्यांनी शिवसेना आणि मनसेचे ठाकरे बंधू यांचे नाव न घेता त्यांच्यावर टीकास्त्र सोडले.

नाशिक शहरात विकास होतच राहील मात्र आम्ही हे शहर गुन्हेगारीमुक्त केले आहे असे ते म्हणाले. सहा महिन्यांपूर्वी या शहरात गुन्हेगारी प्रचंड वाढली होती. दिवसा ढवळ्या खून होत होते. मात्र मुख्यमंत्री देवेंद्र फडणवीस यांनी आदेश काढले. आणि पोलिसांनी कारवाई केली. आता दहा हजाराहून अधिक गुन्हेगार नाशिक शहराबाहेर आहेत.

तीर्थयात्रेला गेलेले हे लोक अजूनही नाशिकचे नाव निघतात धास्तावतात. यापुढेही गुन्हेगारीमुक्त शहर राहील, यासाठी आपल्याला काम करायचे आहे. यावेळी मंत्री पंकजा मुंडे यांचेही भाषण झाले. आमदार सर्वश्री राहुल ढिकले, देवयानी फरांदे आणि सीमा हिरे यावेळी उपस्थित होत्या.