Ajit Pawar Politics: दादा भाजपला घाबरले का?, आधी पालकमंत्रीपदाचा शब्द दिला, जाता जाता म्हणाले, सिरीयसली घेऊ नका!

Ajit Pawar News: नाशिकच्या पालकमंत्री पदाची चर्चा झाली नाही, असा दिवस जात नाही. गेले काही दिवस मात्र हा विषय मागे पडला होता. आता त्याची पुन्हा चर्चा झाली. त्याला कारण देखील तसेच घडले आहे.

नाशिकच्या पालकमंत्री पदाबाबत भारतीय जनता पक्ष आणि शिवसेना एकनाथ शिंदे पक्षात रस्सीखेच सुरू आहे. या राजकीय वादातून हा निर्णय रखडला आहे. जलसंपदा मंत्री गिरीश महाजन यांची झालेली नियुक्ती त्यामुळेच थंड बस्त्यात गेली.

उपमुख्यमंत्री अजित पवार नगरपालिका निवडणूक प्रचाराच्या दौऱ्यावर होते. यावेळी भगूर येथे झालेल्या सभेत हा विषय काढला. मात्र आपल्या स्वभावाच्या विपरीत फिरकी घेण्यासही ते विसरले नाही.

नाशिकचा पालकमंत्री कोण? याबाबत राष्ट्रवादी काँग्रेसच्या कार्यकर्त्यांनी उपमुख्यमंत्री पवार यांच्याकडे आपल्या भावना व्यक्त केल्या. त्यावर अजित पवार यांनी पालकमंत्री नसेल तर मलाच पालकमंत्री समजा, असे विधान केले.

उपमुख्यमंत्री पवार यांच्या या विधानाने सभेतील उपस्थित त्यांनीही टाळ्या वाजवल्या. कार्यकर्ते आणि समर्थकांमध्येही उत्साह संचारला. मात्र नंतर लगेचच पवार यांनी फिरकी घेत "हा विषय सिरियसली घेऊ नका" असे सांगत त्यातील आवाज काढून घेतली.

पालकमंत्री पदावरून शिवसेना शिंदे पक्षाचे शिक्षण मंत्री दादा भुसे आग्रही आहेत. राज्याचे अन्न व नागरी पुरवठा मंत्री छगन भुजबळ यांनीही याबाबत आपली इच्छा जाहीरपणे व्यक्त केली आहे. भाजपने मात्र जलसंपदा मंत्री गिरीश महाजन यांची पालकमंत्री म्हणून नियुक्ती केली होती.

महायुतीतील तिन्ही घटक पक्ष नाशिकचे पालकमंत्री पद आपल्याकडेच हवे यासाठी हट्ट धरून बसले आहेत. त्यामुळे हा राजकीय वाद मुख्यमंत्री आणि दोन्ही उपमुख्यमंत्र्यांच्या कोर्टात गेला आहे. या तिघांनाही गेली वर्षभर त्याबाबत निर्णय घेता आलेला नाही. त्यानिमित्ताने नाशिककरांच्या पालकमंत्री पदाच्या जखमेवरील खपली पुन्हा एकदा निघाली आहे.