Kokate Rummy Video : कोकाटे रमी व्हिडीओ प्रकरणाचा तपास अजून अपूर्ण, अहवाल देण्यास पोलिसांनी मागितली चार दिवसांची मुदत

Manikrao Kokate : विधिमंडळाचे पावसाळी अधिवेशन सुरु असताना सभागृहात तत्कालीन कृषी मंत्री माणिकराव कोकाटे यांचा रमी खेळत असल्याचा कथित व्हिडिओ व्हायरल झाला होता. राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी हा व्हिडिओ समोर आणत सोशल मीडियावर तो व्हायरल केला होता. त्यानंतर कोकाटे यांनी रोहित पवार यांच्याविरोधात नाशिकच्या न्यायालयात अब्रू नुकसानीचा दावा दाखल केला आहे.

आमदार रोहित पवार यांना कोकाटे रमी खेळत असतनाचा व्हिडिओ कुठून मिळाला? हे अद्याप स्पष्ट झालेले नाही. परंतु हा व्हिडीओ कोकाटेंना चांगलाच भोवला त्यांना कृषीमंत्री पद सोडावे लागले. शेतकऱ्यांकडून मोठी टीका झाली. त्यामुळे त्यांनी रोहित पवारांवर थेट अब्रुनुकनानीचा दावा दाखल केला. या दाव्याच्या छाननीनंतर पोलिसांना न्यायालयाने याप्रकरणी तपास करण्यास फ्री हॅण्ड दिले होते.

कोर्टाने या प्रकरणाचा सखोल तपास करुन ३० ऑक्टोबरपर्यंत अहवाल सादर करा, असे निर्देश पोलिसांना दिले होते. त्यानुसार पोलिसांनी याप्रकरणाचा तपास सुरु केला होता. याप्रकरणात कोर्टाने जुन्या सीआरपीसी २०२ कलमाप्रमाणे पोलिस चौकशीचे आदेश दिले आहेत. त्यानुसार विधीमंडळात कोकाटेंचा व्हिडीओ कोणी काढला याचा तपास केला जाणार होता.

मात्र, या प्रकरणाचा तपास करण्यासाठी पोलिस विभागाने चार दिवसांची आणखी मुदत मागितली असून, ती न्यायालयाने मान्य केली आहे. न्यायालयाने आणखी चार दिवसांची मुदत पोलिसांना दिल्याची माहिती मिळाली आहे. दरम्यान चार दिवसांनी पोलिस या प्रकरणात न्यायालयापुढे नेमका काय अहवाल सादर करतात? पोलिसांच्या हाती नेमकं काय लागलयं? त्यावर न्यायालय काय आदेश देणार याकडे लक्ष लागून आहे.

दरम्यान रोहित पवारांनी व्हायरल केलेला व्हिडीओमुळे माणिकराव कोकाटे यांना कृषीमंत्री पद गमवावे लागले. विरोधकांनी या व्हिडीओवरुन मोठे रान उठवले होते. कोकाटे यांच्या थेट राजीनाम्याचीच मागणी विरोधकांनी केली होती. मात्र अजित पवार यांनी खात्यांची आदलाबदली केली. कोकाटेंना क्रीडामंत्री पदाची जबाबदारी दिली. दत्ता भरणे यांच्याकडे कृषीखाते दिले. कृषी सारखे महत्वाचे खाते कोकाटेंच्या हातून निसटले.