Nashik Municipal Election : महापालिका निवडणुकीसाठी भाजप-शिवसेनेची धडाकेबाज तयारी, अजित दादांचा पक्ष इतका शांत का?

Nashik Municipal Election : आगामी महापालिका निवडणुकीची प्रारुप प्रभागरचना जाहीर झाल्यापासून सर्वपक्षीय इच्छुक कामाला लागले आहेत. नाशिकमध्ये भाजपने शंभर प्लसचा नारा दिला आहे, त्या दृष्टीने भाजप आघाडीवर देखील आहे. भाजपकडे गर्दीही आहे. अशात भाजपने स्वबळावर निवडणुका लढवण्याचा निर्णय घेतल्यास शिवसेना (शिंदे गट) ने देखील 'प्लॅन बी' रेडी केला आहे. प्रत्येक जागेवर आपल्या पक्षाचा उमेदवार तयार ठेवावा असे निर्देश शिवसैनिकांना मंत्री दादा भुसे यांनी दिले आहेत. तर शहरात फारशी ताकद नसलेल्या राष्ट्रवादी काँग्रेसकडून (अजित पवार गट) मात्र शांततेची भूमिका घेत वेळेवर निर्णय घेतला जाणार आहे.

महापालिकेच्या सहाव्या पंचवार्षिक निवडणुकीचा कार्यक्रम २०२२ मध्ये संपुष्टात आला. मधल्या काळात प्रशासकीय राजवट होती. तेव्हापासून सर्वच इच्छुक निवडणुकांची वाट पाहत होते. आता नाशिक महापालिकेसाठी शुक्रवारी (ता. २२) रात्री उशिरा सीमा निश्चिती घोषित केल्याने डिसेंबरमध्ये किंवा नवीन वर्षाच्या प्रारंभी (जानेवारी महिन्यात) निवडणुका होण्याची शक्यता आहे. त्यामुळे सर्व इच्छुकांनी हालचाली गतिमान करत मोर्चेबांधणी सुरु केली आहे.

नाशिकमध्ये मागील तीन वर्षात मोठी उलथापालथ घडून आम आदमी पक्षासह तीन नवीन पक्षाचा उदय झाला आहे. त्यामुळे निवडणुकीमध्ये अनेक पर्याय निर्माण झाले. २०१७ च्या निवडणुकीत दुसऱ्या क्रमांकाची मते मिळालेल्या उमेदवारांना शिवसेना (उबाठा) संधी देणार असल्याचे समजते. त्या दृष्टीने इच्छुकदेखील तयारी करत आहे. त्यात मनसेची भूमिका आजून तळ्यात मळ्यात आहे. मनसेच्या भूमीकेवरही नाशिकची राजकीय समीकरणे बदलणार आहे. राज -ठाकरे व फडणवीस यांच्यात झालेल्या भेटीमुळे संभ्रम आणखीनच वाढला आहे. महायुतीच्या भाजप, राष्ट्रवादी काँग्रेस (अजित पवार), शिवसेना (शिंदे) या तिन्ही घटक पक्षांमध्येही महायुती म्हणून निवडणूक लढणार की स्वबळावर हा निर्णय घेणे अद्याप बाकी आहे. परंतु स्थानिक पातळीवरील निवडणुक असल्याने महायुतीमध्येही स्पर्धा सुरु आहे.

महापालिकेत भाजपला कुठल्याही परिस्थिती सत्तेत यायचं आहे. त्यासाठी भाजपने शंभर प्लसचा नारा दिला आहे. त्यादृष्टीने भाजपने मोठी इनकमिंग मोहीम राबवली आहे. त्यात प्रस्थापितांसह अन्य पक्षातील विशेष करून ठाकरे सेनेतील माजी नगरसेवकांना भाजपमध्ये मोठ्या प्रमाणात प्रवेश देण्यात आला आहे. त्या सर्वांनाच उमेदवारी द्यावी लागणार आहे. शंभर प्लसचा आकडा गाठण्यासाठी या सर्वांना निवडून आणावे लागणार आहे. त्यामुळे महायुती म्हणून लढल्यास शिवसेना(शिंदे) व राष्ट्रवादी (अजित पवार) गट जागांमध्ये वाटेकरी होईल. त्यामुळे भाजप स्वबळाचा विचार करु शकतं.

भाजपची स्वबळाची तयारी पाहाता शिंदे शिवसेनेने देखील त्यादृष्टीने तयारी सुरु केली आहे. मात्र भाजप-शिवसेनेकडून निवडणुकीसाठी मोर्चेबांधणी जोरात सुरु असताना या स्पर्धेत राष्ट्रवादी(अजित पवार गट) फारसा कुठेच दिसत नाही. भाजप -शिवसेनेत मोठे इनकमिंग होत होते, त्यावेळेलाही राष्ट्रवादी कुठेच दिसली नाही. त्यामुळे राष्ट्रवादी इतकी शांत का? अशीही चर्चा राजकीय वर्तुळात सुरु आहे.