Nashik Pavan Pawar : 'आमचं साम्राज्य आहे, कोणी लागत नाही नादी ; पवन पवारच्या एका रॅप सॉंगमुळे शिंदेंच्या शिवसेनेची कोंडी

Nashik politic : नाशिक पोलिसांनी राजकीय गुंडावर कारवाई करण्याचा धडाका सुरु केला आहे. नाशिकमधील वाढत्या गुन्हेगारीला अटकाव करण्यासाठी गंभीर गुन्ह्यांत सहभागी असलेल्या अनेक राजकीय गुंडाना नाशिक पोलिसांनी आपला खाक्या दाखवला आहे. सुरुवातीला खुनाच्या गंभीर गुन्ह्यात भाजपचे माजी नगरसेवक उद्धव निमसे व जगदीश पाटील यांना पोलिसांनी अटक केली. त्यामुळे भाजपची मोठी कोंडी झाली.

त्यानंतर आता गोळीबार प्रकरणात नाशिक पोलिसांनी आरपीआयचे जिल्हाध्यक्ष प्रकाश लोंढे, त्याचा मुलगा दीपक लोंढे, भाजपचे पदाधिकारी सुनील बागूल यांचे पुतणे गौरव, सागर आणि अजय बागूल, भाजप मध्ये नुकतेच प्रवेश केलेले मामा राजवाडे यांच्यावर कारवाई केली असून ते पोलीस कोठडीत आहेत. आता शिवसेना शिंदे गटाचा नेता माजी नगरसेवक पवन पवार आणि त्याचे साथीदारही पोलिसांच्या रडारवर आहे. त्यामुळे ऐन महापालिका निवडणुकीत भाजपपाठोपाठ एकनाथ शिंदे पक्षाचीही कोंडी झाली आहे.

पवन पवार व त्याच्या साथीदारांचे एक रील सध्या सोशल मीडीयावर व्हायरल झाले आहे. गँगस्टर शैलीतील रॅप साँग तयार करत ते रिल्स पोस्ट करून नागरिकांमध्ये दहशत निर्माण करण्याचा प्रयत्न केल्याप्रकरणी माजी नगरसेवक पवन पवारसह चौघांविरुद्ध नाशिक रोड पोलिस ठाण्यात गुन्हा दाखल करण्यात आला आहे. या रिलमुळे पवन पवार यांच्या अडचणीत वाढल्या आहे.

सोशल मीडीयावर ही रील सध्या व्हायरल झाली आहे. या व्हिडीओत पवन पवार हा एका अलिशान खूर्चीवर विराजमान आहे. त्याचा साथीदार हे रॅंप सॉंग म्हणत आहे. त्यातून 'आमचं साम्राज्य आहे, कोणी लागत नाही नादी, मोठे लोक आमच्याकडे येतात, मोजीवाले गँगस्टर' अशा शब्दांतून त्यांनी नागरिकांच्या मनात दहशत निर्माण करण्याचा प्रयत्न केला आहे.

या प्रकरणी पोलिसांनी पवन पवार त्यांचे साथीदार सोहेल पठाण, तथागत आशिष वाघमारे व नीलेश भोसले यांच्याविरुद्ध गुन्हा दाखल केला आहे. दरम्यान नाशिकरोड व उपनगर पोलीस ठाण्यात स्वतःचे शुभेच्छा फलक अवैधरीत्या लावल्याप्रकरणी याआधीच पवन पवार व त्यांच्या साथीदारांवर गुन्हा दाखल असून पवन पवार फरार असून पोलिसांकडून त्याचा शोध घेतला जात आहे.