Chhagan Bhujbal : मी फार फार तर मोदीसाहेबांकडे जाईल, नाशिकच्या पालकमंत्रीपदावरुन भुजबळांचे मोठे विधान

Nashik politics : आगामी कुंभमेळा जवळ आल्याने नाशिकच्या पालकमंत्रीपदाला महत्व आहे. परंतु अद्यापही पालकमंत्रीपदाचा तिढा कायम आहे. राष्ट्रवादीचे मंत्री छगन भुजबळ, शिवसेनेचे मंत्री दादा भुसे व भाजपचे मंत्री गिरीश महाजन हे पालकमंत्रीपदासाठी इच्छुक आहे. अशात आता या तिघांमध्ये पुन्हा एकदा पालकमंत्रीपदारुन कलगीतुरा रंगल्याचे पाहायला मिळत आहे.

नुकतेच काही दिवस झाले. अहिल्यानगर येथे दादा भुसेंना यासंदर्भात माध्यम प्रतिनिधींनी प्रश्न केला होता. तेव्हा नाशिक पालकमंत्रीपदाचा विषय आता डोनाल्ड ट्रम्प यांच्याकडेच न्यावा लागेल असं भुसे म्हणाले होते. त्यावर गप्प राहतील ते महाजन कसले. त्यानंतर मंत्री गिरीश महाजन यांनीही ट्रम्प व भुसे यांचे घनिष्ठ संबंध असतील. ते त्यांच्याशी बोलून प्रश्न सोडवतील असा चिमटा काढला होता.

आता अन्न व नागरी पुरवठा मंत्री छगन भुजबळ यांनीही महाजन व भुसे यांना त्यावरुन उपरोधिक टोला लगावला आहे. नाशिकमध्ये माध्यम प्रतिनिधींनी त्यांना महाजन, भुसे हे डोनाल्ड ट्रम्पकडे जाणार आहे का ? असा सवाल केला. त्यावर भुजबळ म्हणाले, मी पण ऐकलं ते की महाजन भुसे डोनाल्ड ट्रम्प यांच्याकडे जाणार आहेत. पण मी काही एवढ्या लांब जाऊ शकत नाही. मी आपला अजित पवार, देवेंद्र फडणवीस , एकनाथ शिंदे यांच्याकडे जाईल. अन् फारच झालं तर मोदी साहेबांकडे जाईन.. यापेक्षा लांब मी जाणार नाही, ती मंडळी जाऊ शकते असं भुजबळ म्हणाले.

दरम्यान, आगामी निवडणुकासंदर्भातही भुजबळांनी भाष्य केलं. प्रत्येक ठिकाणी तिन्ही पक्षांची युती होईलच असे नाही. तिथली परिस्थिती बघून निर्णय घेतील. काही ठिकाणी भाजप बाजूला असेल आणि शिंदे - अजित पवार यांची युती होईल. तर काही ठिकाणी भाजप व अजित पवार युती होईल शिंदे बाजूला असतील असेही होवू शकते. स्थानिक पातळीवर काहीही होऊ शकते असे भुजबळ म्हणाले.

दरम्यान आनंदाचा शिधा यंदा का नाही ? यावर विचारले असता. आनंदाचा शिधा यावेळी अडचणीत आहे. लाडकी बहीण योजनेसाठी ४५ हजार कोटी रुपये खर्च झाला. सध्या नैसर्गिक आपत्तीत शेतकरी अडचणीत असून ३२ हजार कोटी वाटायचे आहे. त्यामुळे काही योजना अडचणीत आहे. पुढच्या वेळी नक्की विचार करू असे भुजबळ म्हणाले.