Vikhe Patil Vs Thorat : विखे-थोरात यांनी एकमेकांच्या घराण्याचे छंदच काढले

माजी खासदार सुजय विखे यांनी संगमनेर किंवा राहुरी विधानसभा मतदारसंघातून निवडणूक लढवण्याची इच्छा व्यक्त केली आहे. यावरून भाजपचे नेते मंत्री राधाकृष्ण विखे आणि काँग्रेसचे ज्येष्ठ नेते आमदार बाळासाहेब थोरात या यांच्यात जुंपल्याचे दिसते.

बाळासाहेब थोरात यांनी सुजय विखेंच्या संगमनेर किंवा राहुरी विधानसभा मतदारसंघात निवडणूक लढण्याच्या इच्छावर टोलेबाजी केली. यावर राधाकृष्ण विखे यांनी मुलाचा छंद जोपासायला आम्ही सक्षम आहोत, असा टोला थोरात यांना लगावला.

बाळासाहेब थोरात ( Balasaheb Thorat ) संगमनेरमधील आश्वी बुद्रुक इथल्या कार्यक्रमात बोलत सुजय विखे यांच्या इच्छावर टोलेबाजी केली. "माजी खासदार सुजय विखे यांनी संगमनेर किंवा राहुरी विधानसभा मतदारसंघात निवडणूक लढण्याचा विचार व्यक्त केला आहे. मोठ्याच लाडकं लेकरू आहे. त्याचा छंद असेल, तर तो पुरवला पाहिजे. या मताचा मी आहे. पक्षाने नाही, तर पालकांनी छंद पुरवला पाहिजे. संगमनेर किंवा राहुरी विधानसभा मतदार संघ या दोन्ही ठिकाणी उभा करा. त्यामुळे बालकाचा छंद तर पुरा होईल", असा बाळासाहेब थोरात यांनी टोला लगावला.

बाळासाहेब थोरात यांनी लवलेल्या टोल्यावरून सुजय विखे यांचे वडील मंत्री राधाकृष्ण विखे ( Radhakrishna vikhe ) यांनी थोरात यांना चांगलेच सुनावले. "आमच्या मुलाचा छंद जोपासायला आम्ही सक्षम आहोत. याबाबत आम्हाला थोरात यांनी शिकवण्याची गरज नाही. तुमच्या घरातील मुलामुलींचा छंद पुरवलेला चालतो. दुसऱ्याच्या मुलाची काळजी का करता?", असा सवाल करत मंत्री विखे यांनी थोरात यांना सुनावले आहे.

मंत्री विखे म्हणाले, "थोरात यांनी, तर सर्व घरदार राजकारणात उतरवले आहे. भावापासून ते जावयापर्यंत सर्वच कुटुंब राजकारणात उतरून तुम्ही तुमचे छंद पूर्ण केलेत. सुजय विखे निर्णय घेण्यासाठी सक्षम आहेत. संगमनेर तालुक्यात निर्माण झालेल्या हुकूमशहाने तालुका पूर्ण उद्ध्वस्त केलाय. ठराविक लोकांचा विकास झाल्याने तालुक्याचे काय झाले आहे, हे जनता रोज अनुभवते. लोकांना आता तिथे नवीन चेहरा हवा आहे आणि तीच भावना लोकांनी आजही व्यक्त करत आहेत. लोकभावनांचा आम्ही आदर करतो. याबाबत पक्षश्रेष्ठींना कळवून योग्य तो निर्णय करतील."

( Edited By : Akshay Sabale )