Lok Sabha Election 2024 : विखे पाटलांनी वाढवलं खासदार हेमंत गोडसेंचं टेन्शन; नाशिकबाबत केलं मोठं विधान

Nashik Politics News: नाशिकमध्ये भाजपने मोठी संघटनात्मक बांधणी केली आहे. त्यामुळे नाशिक मतदारसंघ भाजपला मिळावा ही मागणी आहेच, असे राज्याचे महसूल मंत्री राधाकृष्ण विखे पाटील यांनी आज सांगितले. विखे पाटील यांच्या या विधानामुळे मुख्यमंत्री एकनाथ शिंदे गटाची डोकेदुखी वाढणार आहे. (Lok Sabha Election 2024)

विशेषतः विद्यमान खासदार हेमंत गोडसे यांनी निवडणुकीची जोरदार तयारी केली आहे. सध्या ते प्रचारात देखील व्यस्त आहेत. असे असताना आज दिंडोरी येथे झालेल्या लोकसभा विधानसभा निवडणूक व्यवस्थापन समिती आणि भाजपची कोर कमिटी यांच्या बैठकीत नाशिक मतदारसंघ भाजपला मिळावा, या मागणीला विखे पाटील यांनी दुजोरा दिला. त्यामुळे शिंदे गटात अस्वस्थता निर्माण होणार हे नक्कीच.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

दिंडोरी येथे झालेल्या बैठकीत काही पदाधिकारी आणि नेत्यांनी नाशिक हा मतदारसंघ देखील भाजपकडे असावा, अशी मागणी केली आहे. असे झाल्यास जिल्ह्यातील नाशिक दिंडोरी आणि धुळे हे तिन्ही मतदारसंघ भाजपकडे राहतील. महायुतीचे घटक पक्ष असलेल्या राष्ट्रवादी काँग्रेस अजित पवार गट आणि शिवसेनेच्या मुख्यमंत्री एकनाथ शिंदे गट या घटक पक्षांच्या वाट्याला काय येणार ? याची चिंता सहकारी पक्षांतील दावेदार विद्यमान खासदार हेमंत गोडसे यांना सतावणार आहे.

गेल्या काही दिवसांपासून नाशिक मतदारसंघ महायुतीच्या घटक पक्षांमध्ये चर्चा आणि विवादाचा विषय ठरला आहे. या मतदारसंघात भारतीय जनता पक्षाने गेली वर्षभर विविध स्तरावर निवडणूक लढवण्याची तयारी केली आहे. अनेक इच्छुक उमेदवार पक्षाच्या संपर्कात आहेत.

मात्र शिवसेना एकनाथ शिंदे गट महायुतीत समाविष्ट झाल्यावर विद्यमान खासदार हेमंत गोडसे यांना येथून उमेदवारी मिळेल, अशी अपेक्षा आहे. आता भाजपने या मतदारसंघावर दावा सांगितल्यास घटक पक्षांसाठी कोणते पर्याय देणार हा नवा राजकीय वाटाघाटींचा विषय ठरणार आहे. या सर्व स्थितीत शिवसेनेच्या शिंदे गटाची डोकेदुखी वाढणार हे मात्र नक्की.

(Edited By-Ganesh Thombare)