Raj Thackeray On Sharad Pawar : "राष्ट्रवादी म्हणजे निवडून येणाऱ्या माणसांची मोळी," राज ठाकरेंनी पवारांना डिवचलं

मला माझ्या कडेवर माझी पोरं खेळवायची आहेत. सध्या महाराष्ट्रात दुसऱ्यांची मुलं कडेवर घेऊन फिरण्यात आनंद मिळत आहे. तसलं सुख मला नको आहे. माझ्यात तेवढी ताकद आहे, असं म्हणत मनसे अध्यक्ष राज ठाकरे ( Raj Thackeray ) यांनी भाजपला टोला लगावला. तसेच, राज ठाकरे यांनी राष्ट्रवादी काँग्रेसवरही हल्लाबोल केला. मनसेचा 18 वा वर्धापन दिन नाशिकमध्ये पार पडला. तेव्हा राज ठाकरे कार्यकर्त्यांशी संवाद साधत होते.

"राष्ट्रवादी काँग्रेस पक्षाची स्थापना मनसेच्या पूर्वी झाली. पण, राष्ट्रवादीला ( Ncp ) मी पक्ष संबोधणार नाही. राष्ट्रवादी ही निवडून येणाऱ्या माणसांची बांधलेली मोळी आहे. शरद पवार ( Sharad Pawar ) हेच आजपर्यंत करत आलेत. निवडून येणाऱ्यांना बरोबर घेऊन हा माझा पक्ष असल्याचं शरद पवार सांगतात. ते वेगळे झाले, तरी निवडून येणार आहेत," असा हल्लाबोल राज ठाकरेंनी केला.

"संयम महत्त्वाचा आहे"

"जनसंघ, शिवसेना, मनसे हे पक्ष खऱ्या अर्थानं स्थापन झालेले पक्ष आहेत. यातील 99 टक्के लोकांचा कुठल्याही राजकारणाशी संबंध नव्हता. अविनाश जाधव मनसेत येण्यापूर्वी राजकीयदृष्ट्या कोणत्याही पक्षात सक्रिय नव्हते. असे हजारो तरुण-तरुणी या पक्षात नावारूपाला आले आणि येत आहेत. अनेकजण आमदार-नगरसेवक होतील. पण, संयम महत्त्वाचा आहे," असा सल्ला राज ठाकरेंनी ( Raj Thackeray ) मनसैनिकांना दिला.

"2014 मध्ये कार्यकर्त्यांमुळं भाजपला यश"

"राजकारणात वावरायचं, राहायचं आणि टिकायचं असेल, तर संयम लागतो. तुमच्या आजूबाजूच्या राजकीय पक्षांचं यश दिसत आहे. काहींना वाटतं 2014 मध्ये भाजपला नरेंद्र मोंदीमुळं यश मिळालं आहे. पण, हे संपूर्ण श्रेय पक्षासाठी कार्यकर्त्यांचं आहे," असंही राज ठाकरे म्हणाले.

R