Raj Thackeray : तपोवनातील वृक्षतोड प्रकरणात राज ठाकरेंची उडी, सरकारला दिला इशारा.. म्हणाले, संघर्ष वाढवू नका

Nashik News : नाशिकमध्ये आगामी कुंभमेळ्याची तयारी सुरु आहे. कुंभमेळ्यासाठी नाशिकमध्ये येणाऱ्या साधूंच्या निवासाकरिता तपोवनातील तब्बल १८०० झाडे तोडली जाणार आहे. कुंभमेळा मंत्री गिरीश महाजन यांचेही या वृक्षतोडीला समर्थन आहे. यावरुन मोठा वाद निर्माण झाला असून या वृक्षतोडीविरोधात पर्यावरणप्रेमी एकवटले आहेत. त्यांनी तपोवनात मोठे आंदोलन सुरु केले आहे. अभिनेते सयाजी शिंदे यांनीही या आंदोलनाला पाठिंबा दिला आहे.

आता याप्रकरणात महाराष्ट्र नवनिर्माण सेनेचे अध्यक्ष राज ठाकरे यांनीही उडी घेतली आहे. या लढ्यात महाराष्ट्र नवनिर्माण सेना नाशिकरांसोबत असल्याचं राज ठाकरेंनी म्हटलं आहे. नाशिकमध्ये मनसेची सत्ता असतानाही कुंभमेळा झाला होता. त्यावेळी एकही झाड न तोडता कुंभमेळा झाला होता याची आठवण करुन देत राज ठाकरेंनी सरकारला इशारा दिला आहे.

राज ठाकरे म्हणाले, नाशिकमध्ये कुंभमेळा हा काही पहिल्यांदा होत नाहीये. महाराष्ट्र नवनिर्माण सेनेच्या महापालिकेच्या सत्ताकाळात पण कुंभमेळा झाला. त्यावेळेला आम्ही भरपूर पायाभूत सुविधा उभारल्या. त्यावेळच्या नगरसेवकांचा आणि प्रशासनाचा उत्तम संवाद होता, त्यामुळे कामं करताना जनतेला काय हवं आहे याचा विचार केला गेला. एकूणच नियोजन इतकं उत्कृष्ट होतं की तेव्हाच्या महापौरांचा,नगरसेवकांचे प्रतिनिधी म्हणून आणि तत्कालीन आयुक्तांचा, प्रशासनाचे प्रतिनिधी म्हणून, थेट अमेरिकेत सत्कार झाला होता. आम्हाला या पायाभूत सुविधा उभ्या करताना कुठली झाडं तोडावी लागली नाहीत. मग आत्ता या कुंभमेळ्यासाठी झाडं का तोडावी लागत आहेत ?

बरं ही झाडं तोडून त्याची भरपाई म्हणून दुसरीकडे झाडं लावली जातील, असली पोकळ आश्वासनं सरकारने देऊच नयेत कारण असं कधी होत नाही. आणि सरकारकडे जर दुसरीकडे पाचपट झाडं लावायला जागा आहे तर मग तिकडेच साधुग्राम करा. सरकारने साधूंच्या नावाखाली उद्योगपतींच्या घशात काहीतरी टाकण्याचा संधिसाधूपणा करू नये. आणि काही कोटी झाडं लावल्याची घोषणा भाजप सरकारने काही वर्षांपूर्वी केली होती, जी झाडं कुठे दिसली नाहीत.

आज कुंभमेळ्याचं कारण दाखवून झाडं तोडायची, साधूंच्या नावाने ती जमीन सपाट करून घ्यायची आणि मग नंतर पुढे ती आपल्या लाडक्या उद्योगपतीला दान करायची ! इतकाच विचार या सरकारचा असणार ! नाहीतरी सध्या महाराष्ट्रात दुसरं काय सुरू आहे? जमिनी गिळणं नाहीतर उद्योगपतींचे दलाल म्हणून काम करणं हेच सध्या सत्ताधारी मंत्री, आमदार , त्यांचे नातेवाईक आणि त्यांची वर्तुळं करताना दिसतायत असा आरोप राज ठाकरेंनी केला.

नाशिककरांचा या वृक्षतोडीला तीव्र विरोध आहे. नाशिकरांना माझं आवाहन आहे की तुम्ही ठाम रहा, तुमच्या पाठीशी महाराष्ट्र नवनिर्माण सेना उभी राहील. यामध्ये खरतर कोणतेच राजकारण नाही , या आत्ता होणाऱ्या निवडणुकांनंतर देखील आमचा या वृक्षतोडीला विरोधच राहील ! माझं सरकारला आवाहन आहे की उगाच संघर्ष वाढवू नका. लोकांचं काय म्हणणं आहे त्याचा कधीतरी आदर राखला जाईल असं पहा.

तरीपण सरकारने संघर्षाची भूमिका घेतली तर जनतेच्या बरोबर या लढ्यात महाराष्ट्र नवनिर्माण सेना आहेच आणि असेलच असे राज ठाकरे यांनी म्हटले आहे. त्यांनी यासंदर्भात एक्सपोस्ट देखील केली आहे.