Girish Mahajan : तपोवनातील झाडे तोडणारच! गिरीश महाजन मागे हटण्याच्या मूडमध्ये नाहीत: 15 हजार खड्डे खणायला सुरुवात

Nashik News : नाशिकमध्ये आगामी कुंभमेळ्याची तयारी सुरु असून येणाऱ्या साधूंना राहण्याची व्यवस्था करण्यासाठी तपोवनात साधूग्राम उभारण्यात येणार आहे. परंतु त्यासाठी तपोवनातील तब्बल 1800 झाडांवर कुऱ्हाड चालवली जाणार आहे. या वृक्षतोडीला कुंभमेळा मंत्री गिरीश महाजन यांचेही समर्थन असून यावरुन सध्या नाशिकमधील नागरिक व पर्यावरण प्रेमींचे तीव्र आंदोलन उभे राहिले आहे. या वृक्षतोडीला पर्यावरण प्रेमींनी कडाडून विरोध केला आहे. अभिनेते सयाजी शिंदे हेही वृक्षतोडीविरोधात उभे राहिले आहेत.

या वृक्षतोडीवरुन मंत्री गिरीश महाजन यांच्यावर प्रचंड टीका होत आहे. गिरीश महाजन हे हुकुमशाह आहेत असा आरोप पर्यावरण प्रेमींनी केला आहे. गिरीश महाजन यांना पर्यावरण प्रेमींनी चक्क लाकुडतोड्या असेही संबोधले. अखेर या पार्श्वभूमीवर गिरीश महाजन यांनी यासंदर्भात आपली व महायुती सरकारची बाजु मांडली आहे.

महाजन म्हणाले, आम्ही सुद्धा वृक्षप्रेमी आहोत. मुख्यमंत्री देवेंद्रजींची तसे पंतप्रधान मोदीजींची भूमिका, याबाबत स्पष्ट आहे. आम्ही तपोवनातील तोडण्यात येणार्‍या झाडांच्या मोबदल्यात इतर ठिकाणी झाडं लावणार आहोत, असे गिरीश महाजन यांनी स्पष्ट केले. ते शुक्रवारी मालेगाव येथे एका कार्यक्रमात बोलत होते.

महाजन पुढे म्हणाले, वृक्ष तोडण्याच्या बाजूने आम्ही अजिबात नाही. उलट आम्ही पावसाळ्यात किती ठिकाणी वृक्ष लावतो. पंरतु तपोवनातील जागा साधुग्रामसाठी शेकडो वर्षांपासून आरक्षित आहे. त्या ठिकाणी आता उगवून आलेली झाडे मागच्यावेळेलाही काढण्यात आली होती. जी झाडे मोठी आहेत त्यांना आम्ही हात लावणार नाही. जी झाडे या पाच-सात वर्षात उगवलेली आहेत, रोपटी-झुडपे आहेत त्यांनाच आम्ही हलवणार आहोत.

जे सात आठ वर्षातली प्लांटेशन आहेत ते आम्ही दुसरीकडे काढून लावणार आहोत. त्यासाठी ४-५ जागा आम्ही शोधलेल्या आहेत. आम्ही कालपासून पंधरा हजार खड्डे करायला सुरुवात केली आहेत. मी स्वतः हैदराबादला जाऊन आठ फुटी, दहा फुटी झाडे आणून त्या ठिकाणी लावणार आहोत, असे गिरीश महाजन यांनी सांगितले.

महाजन पुढे म्हणाले, पुढच्या दोन वर्षात तपोवनात कसा बदल होतो तो तुम्ही बघाच. येथील मोठी झाडं आम्ही शंभरटक्के जगवणार आहोत. तपोवनातील जागा साधूग्रामसाठी गरजेचे आहे. शेकडो वर्षापासून साधू तेथे राहत असल्याची परंपरा आहे. त्यामुळे थोडी आमची ही बाजू समजून घ्या. कुंभमेळा हा आपला सर्वात मोठा धार्मिक सोहळा आहे. १२ वर्षातून तो एकदा येतो.

वृक्षतोड होणार आहे याचा अर्थ आम्ही वृक्षतोडण्याच्या मागे लागलो आहोत असे समजायचे काही कारण नाही. मी शंभर टक्के सांगतो. एका झाडाला दहा नाही तर पंधरा झाडे लावतो. हजार झाडे तोडल्यावर आम्ही पंधरा हजार झाडे लावणार आहोत. जो खर्च येईल ती महापालिका या ठिकाणी करेल, असेही महाजनांनी सांगितले.