Sayaji Shinde : साधू आले गेले आम्हाला फरक पडत नाही, सयाजी शिंदेंनी गिरीश महाजनांना खडसावले

Nashik News : कुंभमेळ्यासाठी साधूंच्या निवासाकरिता नाशिकच्या तपोवनातील तब्बल १८०० झाडे तोडण्याचा घाठ प्रशासनाने घातला आहे. नाशिककरांसह पर्यावरण प्रेमींनी या वृक्षतोडीला विरोध केला आहे.

जेष्ठ अभिनेते सयाजी शिंदे हे देखील या वृक्षतोडीविरोधात उभे राहिले असून त्यांनी आज नाशिकमधील वृक्षप्रेमींच्या आंदोलनाला पाठिंबा दिला. तपोवन परिसरात प्रत्यक्ष त्यांनी आज भेट दिली.

या वृक्ष तोडीला कुंभमेळा मंत्री गिरीश महाजन यांनी समर्थन केले आहे. तोडलेल्या एक हजार झाडांच्या बदल्यात पंधरा हजार झाडे लावू असे महाजन यांनी म्हटले आहे. त्यामुळे सयाजी शिंदेंनी महाजन यांचा चांगलाच समाचार घेतला. महाजन तुम्ही अशी वादग्रस्ते विधाने करू नका. या जगात केवळ झाडंच सेलिब्रेटी आहेत. त्यांना संरक्षण द्या असे आवाहन शिंदेंनी केले आहे.

सयाजी शिंदे तपोवनातील वृक्षतोडीवरुन आज चांगलेच भडकल्याचे दिसले. ते म्हणाले, झाड म्हणजे आपले आई बाप आहेत. साधूग्रामसाठी एकही झाड तुटू द्यायचे नाही, साधू आले गेले आम्हाला काहीही फरक पडत नाही, पण झाडे गेले तर फरक पडेल. कुठला कुंभमेळा आणि कुठले साधूग्राम? असा सवाल करत त्यांनी वृक्षतोड करावीच लागेल अशी भूमिका घेणाऱ्या महाजनांना खडसावलं.

सयाजी शिंदे पुढे म्हणाले, या जगाच कोणताच सेलिब्रिटी नाही, जगात एकच सेलिब्रिटी आहे आणि तो म्हणजे झाड आहे. त्यांना संरक्षण द्या. हिडन अजेंडा राबवू नका. साधुग्रामसाठी एकही झाड तुटता कामा नये. आपल्याच माणसांनी आपल्याच माणसांना फसवलं तर ती आपली माणसं कसं म्हणायचं, या भाषेत त्यांनी महाजनांना सुनावलं.

साधू महंतांच्या राहण्याची व्यवस्था करण्यासाठी १० वर्षांची झाडे तोडण्यात येणार आहेत यावर बोलताना शिंदे म्हणाले. चांगली माणसं ही साधूसंत असतात. एका जागेत दहा माणसांची गरज असताना तिथे हजार माणसं आली तर, ते साधूसंत नसतात. अशा माणसांनी येथे येऊन नाशिकची वाट लावू नये. सर्व नाशिककरांनी याविरोधात एकत्र आलं पाहिजे. येथे गवताची काडी देखील तुटली नाही पाहिजे असे आवाहन शिंदेंनी केले.

संत महात्म्यांचा विचार घेऊन आपण पुढे जातोय, असे आपण सांगत असतो. मग झाड जाणे हा शिवरायांचा अपमान आहे.. हा संत ज्ञानेश्वर आणि संत तुकारामांचा अपमान आहे...आम्ही वृक्ष तोडू नका, अशी वारंवार विनंती करुनही सरकार मागे हटायला तयार नाही. पण वेळ आली तर आम्ही सरकारविरोधात जाऊ असा इशारा त्यांनी दिला. (Nashik News)

सह्याद्री देवराईच्या चाळीस देवराई आहेत, आम्हा सगळ्यांच्या वतीने नाशिककरांच्या आंदोलनाला आमचा पाठिंबा आहे. एकही झाड तुटू द्यायचे नाही, झाड म्हणजे आपले आई बाप आहेत. साधू आले गेले आम्हाला फरक पडत नाही, पण झाड गेल्याने नक्कीच पुढच्या पिढ्यांना फरक पडेल याकडे त्यांनी सरकारचे लक्ष वेधले. गिरीश महाजन माझी तुमच्यासोबत दुश्मनी नाही आणि झाली तरी काही हरकत नाही या भाषेत सयाजी शिंदेंनी गिरीश महाजनांना आव्हान दिलं आहे..