Dhule Cash Controversy: अनिल गोटे यांचा निशाणा... धुळे रोकड प्रकरणात काँग्रेस, राष्ट्रवादीच्या नेत्यांचे मौन का?

Shivsena UBT News: विधिमंडळ अंदाज समितीचा धुळे आणि नंदुरबार जिल्हा दौरा नुकताच झाला. हा दौरा अध्यक्ष अर्जुन खोतकर यांच्या स्वीय सहाय्यकाकडे रोकड सापडल्याने वादात सापडला आहे. यासंदर्भात पोलीस आणि सर्वच यंत्रणांनी तपास करण्यात टाळाटाळ केल्याचे पुढे आले आहे.

विधिमंडळ अंदाज समितीचे अध्यक्ष आणि शिवसेना एकनाथ शिंदे पक्षाचे आमदार अर्जुन खोतकर यांच्यासह समिती सदस्यांचा दौरा झाला. या दौऱ्यात आमदार खोतकर यांचे स्वीय सहाय्यक पाटील यांच्या धुळ्याच्या शासकीय विश्रामगृहात कक्ष क्रमांक १०२ मध्ये पाच कोटी रुपये असल्याचा आरोप करण्यात आला होता. शिवसेना उद्धव ठाकरे पक्षाचे नेते माजी आमदार अनिल गोटे यांनी याबाबत स्टिंग ऑपरेशन केले होते.

या प्रकरणाची राज्यभर चर्चा झाली. एव्हढ्या मोठ्या प्रमाणावर रोकड सापडल्याने त्याची दखल राज्याच्या मुख्यमंत्री देवेंद्र फडणवीस तसेच विधानसभेचे अध्यक्ष राहुल नार्वेकर यांनी देखील घेतली. या प्रकरणाच्या चौकशीसाठी विशेष तपास समिती नियुक्त करण्याची घोषणा झाली. ज्यांच्या कक्षात पैसे सापडले त्या पाटील यांना निलंबीत करण्यात आले. मात्र विरोधी पक्षांनी हा विषय गांभिर्याने घेतल्याचे दिसले नाही. त्यामुळे त्याबाबत शिवसेना उद्धव ठाकरे पक्षाच्या नेत्यांनी नाराजी व्यक्त केली आहे.

याबाबत माजी आमदार अनिल गोटे यांनी सातत्याने पाठपुरावा केला आहे. पोलीस अधीक्षक श्रीकांत देवरे यांनी याबाबत तपास केल्याचा दावा केला जातो. विश्रामगृहातील आवक जावक नोंदवही आणि सीसीटीव्ही फुटेज पोलिसांनी जप्त केले आहे. मात्र अद्यापही कोणा विरोधातही तक्रार दाखल करण्यात आलेली नाही. त्यामुळे हे प्रकरण दडपण्याचा प्रयत्न होत असल्याचा आरोप शिवसेना उद्धव ठाकरे पक्षाचे नेते माजी आमदार गोटे यांनी केला आहे.

या संदर्भात मुख्यमंत्री देवेंद्र फडणवीस यांनी एसआयटी मार्फत चौकशीची घोषणा केली होती. मात्र अद्यापही एसआयटीचे सदस्य कोण हे अद्याप स्पष्ट झालेले नाही. त्यामुळे एसआयटी कडून देखील या संदर्भात कोणताही तपास झालेला नाही.

या प्रकरणात शिवसेनेचे नेते खासदार संजय राऊत आणि आमदार भास्कर जाधव यांनी राज्य शासनावर गंभीर आरोप केले होते. रोकड सापडलेला कक्ष समितीचे अध्यक्ष खोतकर यांच्या स्वीय सहाय्यकाचा आहे. त्यामुळे हे पैसे कोणाचे आणि कशाप्रकारे लाच देण्यासाठी जमा केले होते, याच्या चौकशीची मागणी खासदार राऊत यांनी वारंवार केली होती.

राज्यभर गाजलेल्या या गंभीर प्रकरणावर काँग्रेसचे आणि राष्ट्रवादी काँग्रेस शरदचंद्र पवार पक्षाच्या नेत्यांनी मात्र बोटचेपी भूमिका घेतल्याची नाराजी माजी आमदार गोटे यांनी व्यक्त केली आहे. विरोधी पक्षांनी सत्ताधारी महायुती आणि शिवसेना एकनाथ शिंदे पक्षाला खिंडीत गाठण्याची ही संधी सोडली. गंभीर प्रकरण असूनही विरोधी पक्षांनी याबाबत सरकारविरोधी वातावरण निर्मिती करण्याची संधी घालवणे अशी नाराजी आणि सुचक टीका गोटे यांनी केली आहे. त्यामुळे हे प्रकरण पुन्हा एकदा चर्चेत आले आहे.

-----