Shivsena Vs Congress: राहुल गांधींना धमकावणं पडलं महागात, अखेर ठाकरेंच्या शिलेदाराविरोधात पोलिसांनी उचललं मोठं पाऊल

Nashik News: विधानसभा निवडणुकीनंतर महाविकास आघाडीत खटक्यावर खटके उडाल्याचं लपून राहिलेलं नाही. यातच स्वातंत्र्यवीर सावरकरांचा माफीवीर म्हणून उल्लेख करत काँग्रेसचे नेते राहुल गांधी (Rahul Gandhi) यांनी वारंवार महाविकास आघाडीतील उद्धव ठाकरेंच्या शिवसेनेला अडचणीत आणलं. पण यावेळी सावरकरांविरोधात केलेल्या टिप्पणीवरुन ठाकरेंच्या शिलेदारानं थेट राहुल गांधींच्या तोंडालाच काळं फासण्याची भाषा केली होती. यावरुन आघाडीतील काँग्रेस आणि ठाकरेंच्या शिवसेनेत घमासान सुरू झालं होतं. अशातच आता पोलिसांनी ठाकरेंच्या शिलेदाराविरोधात गुन्हा दाखल केला आहे.

शिवसेनेचे वादग्रस्त कार्यकर्ते बाळा दराडे अडचणीत आले आहेत. लोकसभेतील विरोधी पक्ष नेते राहुल गांधी यांच्या विरोधात स्टंट करणे त्यांना चांगलेच महागात पडले आहे. पोलिसांनीही दराडे यांची नाकेबंदी केली.तसेच काँग्रेसचे शहराध्यक्ष आकाश छाजेड यांनीही कार्यकर्त्यांसह अंबड पोलिसांंची भेट घेत यारप्रकरणी कारवाईची मागणी केली होती.

शिवसेनेचे (Shivsena) वादग्रस्त कार्यकर्ते बाळा दराडे यांनी लोकसभेतील विरोधी पक्षनेते यांना आव्हान दिले होते. राहुल गांधी नाशिकला आल्यास यांच्यावर शाही फेक करून तोंडाला काळे फासण्यात येईल. या संदर्भात शिवसेनेच्या भूमिकेलाही त्यांनी आव्हान दिले होते. त्यामुळे तो चर्चेचा विषय झाला होता.

महाविकास आघाडी गेली खड्ड्यात. सावरकर आणि हिंदुत्व यासाठी आम्ही राहुल गांधींच्या वाहनांचा ताफा अडवून त्यावर दगडफेक करू अशी आक्षेपार्ह आणि चितावणी देणारे वक्तव्य त्यांनी केले होते. शिवसेना उद्धव ठाकरे पक्षाच्या पदाधिकाऱ्यांनी त्यांच्या वक्तव्याशी हरकत घेत ते त्यांचे वैयक्तिक मत असल्याचे म्हटले होते. त्यामुळे दराडे अडचणीत येण्याची शक्यता होती.

दराडे यांच्या वक्तव्यानंतर संभाजी ब्रिगेड सक्रिय झाली. आक्रमक झालेल्या संभाजी ब्रिगेडच्या पदाधिकाऱ्यांनी दराडे यांना थेट आव्हान दिले. स्वातंत्र्यवीर सावरकर यांनी ब्रिटिशांची माफी मागितली होती की नाही? त्यांना ब्रिटिश सरकार पेन्शन देत होते की नाही? या प्रश्नावर दराडे यांनी चर्चेला यावे असे खुले आव्हान संभाजी ब्रिगेडने दिले. या विषयावर शिवसेना उद्धव ठाकरे पक्षातही वैचारिक गोंधळ असल्याचा आरोप ब्रिगेडने केला होता.

राहुल गांधी नाशिकला आल्यास संभाजी ब्रिगेड त्यांच्या वैचारिक भूमिकेचे समर्थन करेल. त्यांची भूमिका हीच बहुतांशी सुजाण, सुज्ञ आणि शिक्षित नागरिकांची भूमिका आहे. दडपशाही करून कोणाचेही तोंड बंद करता येणार नाही, असे संभाजी ब्रिगेडचे अध्यक्ष संतोष गायधनी यांनी म्हटले आहे.

यासंदर्भात काँग्रेसचे सिडकोतील अध्यक्ष विजय पाटील यांनी बाळा दराडे यांचा तीव्र शब्दात निषेध केला होता. राहुल गांधी यांच्या समर्थनार्थ त्यांनी ठीक ठिकाणी होर्डिंग लावून गांधी यांना पाठिंबा दर्शविला होता. त्यामुळे आज दिवसभर राजकीय कार्यकर्त्यांमध्ये हा विषय चर्चेचा ठरला.

सकाळी काँग्रेसचे विभागीय अध्यक्ष विजय पाटील आणि अन्य पदाधिकाऱ्यांनी शहर पोलीस आयुक्त यांची भेट घेऊन तक्रार केली. राहुल गांधी यांच्या जीविताला धोका आहे. या स्थितीत दराडे यांनी केलेले वक्तव्य गुन्हेगारी स्वरूपाचे आहे. कठोर कारवाई करावी अशी मागणी करण्यात आली.

त्यानंतर अंबड पोलीस ठाण्याच्या अधिकाऱ्यांनी काँग्रेसच्या मागणीची दखल घेतली. याबाबत शहराचे पोलीस आयुक्त संदीप कर्णिक यांनी देखील सूचना केल्या होत्या. दराडे यांच्या विरोधात अंबड पोलीस ठाण्यात अदखलपात्र गुन्हा दाखल करण्यात आला आहे. श्री दराडे यांच्याशी संपर्क साधला असता ते उपलब्ध होऊ शकले नाही.