धनूरला तणाव कायम; शिवरायांच्या पुतळ्याची स्थिती ‘जैसे थे’

कापडणे : धनूर (Dhule) येथे शुक्रवारी मध्‍यरात्रीनंतर ग्रामपंचायतीलगत अश्‍वारूढ छत्रपती शिवाजी महाराजांचा (Shivaji Maharaj Statue) पुतळा अज्ञातांनी उभारला. हा विनापरवानगी पुतळा हटविण्यावरून पोलिस (Police) व ग्रामस्‍थांमध्‍ये वाद सुरू आहे. महिलांनी पुतळा हटवू नये, यासाठी रात्रभर ठिय्या आंदोलन केल्याने दोन दिवसांपासून येथे तणावपूर्ण स्थिती आहे.

सर्वत्र छत्रपती शिवाजी महाराजांची जयंती जल्‍लोषात साजरी होताना धनूर (ता. धुळे) येथे मात्र महसूल व पोलिस प्रशासनाला अभूतपूर्व पेच प्रसंगाला सामोरे जावे लागत आहे. सर्वोच्‍च न्‍यायालयाच्‍या निर्देशानुसार पुतळा समितीची स्‍थापना व विविध शासकीय परवानगी घेतल्‍यानंतर पुतळा उभारणीला मंजूर दिली जाते. परंतु, धनूर येथे विनापरवानगी छत्रपती शिवरायांचा पुतळा उभारला. यामुळे पुतळा हटविण्यावरून हा वाद निर्माण झाला आहे.

प्रशासनाने सरपंच सत्‍यभामाबाई शिंदे यांना नोटीसही बजावली. चर्चा सुरू असताना काँग्रेसचे आमदार कुणाल पाटील व राष्ट्रवादीचे जिल्‍हा परिषद सदस्‍य किरण पाटील यांनी त्यात हस्तक्षेप केला. याबाबत तहसीलदारांशी चर्चा करणार असल्याचे त्यांनी सांगितले. काल सायंकाळी आमदार पाटील यांच्या मध्यस्थीनंतर ठिय्या आंदोलन स्थगित झाले. मात्र अद्यापही तणाव कायम आहे.

दरम्यान भाजपचे खासदार डॉ. सुभाष भामरे, माजी कृषी सभापती अरविंद जाधव व बापू खलाणे, जिल्हा परिषदेचे माजी अध्यक्ष मनोहर भदाणे, राम भदाणे, संजय वाल्हे, रितेश पाटील, मनोज मोरे आदी गावात दाखल झाले होते. पुतळ्यासाठी खासदार निधीतून दहा लाखांचा निधी देण्याचे त्यांनी घोषित केले. जिल्‍हा मराठा क्रांती मोर्चाचे मनोज मोरे, मराठा संघटनांचे प्रतिनिधी व शिवप्रेमी संघटनांचे पदाधिकारी घटनास्‍थळी दाखल झाले होते. ग्रामस्‍थांनी नियमांचे पालन करत सहकार्य करावे, असे आवाहन महसूल व पोलिस प्रशासनाने केले.

तर ग्रामपंचायत बरखास्त?

ग्रामपंचायत कार्यालयाच्या जागेत पुतळा बसविला आहे. पंचायतीने जबाबदारी नाकारून चालणार आहे. सहकार्य न केल्यास पंचायत बरखास्तीचाही निर्णय घेतला जाईल, असे एका जबाबदार अधिकाऱ्याने कालच्या बैठकीत सुनावल्यावर आम्हीच सामूहिक राजीनामा देवू, अशी भूमिकाही सदस्यांनी घेतली होती.

---