Gulabrao Patil News : जळगाव बाजार समितीत वर्चस्वासाठी आजी-माजी पालकमंत्री आमने-सामने

Gulabrao Patil vs Gulabrao Devkar : जळगाव बाजार समिती संचालकपदाच्या निवडणुकीच्या प्रचाराचा बुधवारी (ता.२६) शेवटचा दिवस आहे. समितीवर वर्चस्वासाठी विद्यमान पालकमंत्री गुलाबराव पाटील व माजी पालकमंत्री गुलाबराव देवकर यांच्यात लढत आहे. प्रचारात दोघांनी आपली ताकद पणाला लावली आहे.

जळगाव बाजार समितीच्या (Jalgaon APMC Election) संचालकपदासाठी शुक्रवारी (ता.२८) मतदान होत आहे. बाजार समितीत विद्यमान पालकमंत्री गुलाबराव पाटील व राज्याचे ग्रामविकास मंत्री गिरीश महाजन यांच्या नेतृत्वाखाली सहकार विकास पॅनल तर जिल्ह्याचे माजी पालकमंत्री गुलाबराव देवकर यांच्या नेतृत्वाखाली शेतकरी विकास पॅनल याच्यात लढत आहे.

बाजार समितीत सध्या गुलाबराव पाटील (Gulabrao Patil) यांच्या नेतृत्वाखाली सत्ता होती. त्यावेळी भाजप व शिवसेना (उबाठा) सोबत होती. मात्र शिवसेना पक्षफुटीनंतर समिकरण बदलले. भारतीय जनता पक्ष आता गुलाबराव पाटील याच्या शिंदे गटासोबत आहे. तर शिवसेना (उबाठा) गट काँग्रेस, राष्ट्रवादी सोबत आहेत.

जळगाव बाजार समितीत जळगांव ग्रामीण मतदार संघाचा मोठा भाग आहे. त्यामुळे या मतदार संघाचे आमदार जिल्ह्याचे पालकमंत्री गुलाबराव पाटील व माजी आमदार व माजी पालकमंत्री गुलाबराव पाटील यांच्या नेतृत्वाची खरी लढत आहे. पालकमंत्री पाटील यांना बाजार समितीवर सत्ता कायम ठेवण्याचे तर माजी मंत्री देवकर यांना सत्ता काबीज करण्याचे आव्हान आहे. दोन्ही नेत्यांनी जोरदार प्रचाराचा राळ उठविली आहे. ग्रामीण भागात शेतकऱ्यांच्या बैठक दोन्ही गटातर्फे घेण्यात येत आहे.

पालकमंत्री गुलाबराव पाटील यांनी सहकार विकास पॅनलतर्फे शेतकरी हिताच्या निर्णयसाठी आम्ही बांधील असल्याचे जाहिर केले. शेतकऱ्यांना बाजार समितीत त्यांच्या मालाला चांगला भाव तसेच त्यांना चांगला सुविधा देण्यात येतील तर उपबाजाार समित्या बळकट करण्याची ग्वाही त्यांनी दिली आहे. तर शेतकरी विकास गुलाबराव देवकर (Gulabrao Devkar) यांच्या शेतकरी विकास पॅनलतर्फे गुलाबराव देवकर यांनी बाजार समितीत शेतकरी हिताच्या निर्णयाबरोबरच शेतकऱ्यांना त्यांचा मालाचा दाम ताबडतोब मिळण्यासह इतर चांगल्या सुविधांचीही हमी दिली आहे.

दरम्यान, बुधवारी जळगाव बाजार समितीच्या प्रचारतोफा थंडावणार आहेत. तर शुक्रवारी (ता. २८) मतदान होणार आहे. पालकंमत्री गुलाबराव पाटील यांच्या सहकार पॅनलचा मेळावा मंगळवारी (ता. २५) जळगावात पार पडला. तर गुलाबराव देवकर यांच्या शेतकरी विकास पॅनलचा मेळावा बुधवारी होणार आहे. अंतीम टप्प्यात प्रचाराला वेग आला असून दोन्ही गुलाबरावांनी बाजार समितीत वर्चस्वासाठी कंबर कसली आहे. मतदार कोणाला कौल देणार व कोण बाजी मारणार हे रविवार (ता. ३०) निकालात दिसून येईल. तोपर्यंत आम्हीच विजयी होणार हे दोन्ही गटातर्फे दावा केला जात आहे.