Nashik Politics : जून महिन्यात मोठं शक्तिप्रदर्शन करत विलास शिंदे यांनी शिवसेना उद्धव बाळासाहेब ठाकरे पक्षाला सोडचिठ्ठी देत एकनाथ शिंदे यांच्या नेतृत्वातील शिवसेना पक्षात प्रवेश केला. ठाकरे यांच्या पक्षात असताना विलास शिंदे यांच्याकडे महानगरप्रमुख पद होतं. आता एकनाथ शिंदेंना त्यांना बढती देत नवीन जबाबदारी सोपवली आहे.
शिवसेना पक्षाचे प्रमुख व उपमुख्यमंत्री एकनाथ शिंदे यांच्या आदेशानुसार विलास शिंदे यांची आता नाशिक शिवसेना संपर्कप्रमुख पदी नियुक्ती करण्यात आली आहे. त्यानंतर राजकीय वर्तुळातून योग्य व्यक्ती, सार्थ निवड अशा प्रतिक्रिया येत आहेत. शेवटी शिंदे-शिंदेकडे आले आणि पक्षात महत्वाची जबाबदारीही त्यांना देण्यात आली आहे.
आगामी महापालिका निवडणुकीच्या दृष्टीने विलास शिंदे यांच्यावर एकनाथ शिंदे यांनी संपर्कप्रमुखपदाची जबाबदारी दिली आहे. नाशिक महापालिका निवडणुकीसाठी शिवसेनेने व भाजपने मिळून मोठे इनकमिंग मोहिम राबवले. कोणत्याही परिस्थिती नाशिक महापालिका निवडणूक सत्ता आणायची असा चंग दोन्ही पक्षांनी बांधला आहे. त्याचाच भाग म्हणून विलास शिंदे यांच्यासारखा दांडगा जनसंपर्क असलेला नेता एकनाथ शिंदेंनी उद्धव ठाकरेंच्या गोटातून खेचून आणला.
एकनाथ शिंदे यांनी नाशिकमध्ये येत विलास शिंदे यांच्या मुलीच्या लग्नाला हजेरी लावली होती. त्याचवेळी त्यांनी विलास शिंदे यांच्या पक्षप्रवेशाचे संकेत दिले होते. शेवटी शिंदे शिंदेकडेच येणार असं एकनाथ शिंदे यांनी म्हटलं होतं. त्यानंतर थोड्याच दिवसांत दोन्ही शिंदेंची पुन्हा धावती भेट झाली होती. या सगळ्या घडामोडी पाहाता विलास शिंदे एकनाथ शिंदेसोबत जात आहेत, याची चाहूल लागताच उद्धव ठाकरेंनी विलास शिंदे यांची पक्षातून हकालपट्टी केली होती. विलास शिंदेंना महानगरप्रमुख पदावरुन तडकाफडकी हटवण्यात आलं होतं. त्यानंतर त्यांनी एकनाथ शिंदे यांच्या नेतृत्वातील शिवसेनेत प्रवेश केला.
विलास शिंदे हे शिवसेनेचे अत्यंत जुने कार्यकर्ते आहेत. शिवसेनेत बंड झाल्यानंतर विलास शिंदे हे उद्धव ठाकरे यांच्यासोबत राहिले. त्यामुळे उद्धव ठाकरेंनी त्यांच्यावर महानगरप्रमुख पदाची जबाबदारी दिली. परंतु ते तेवढ्यावर समाधानी नव्हते. पक्षाने महत्वाच्या पदांपासून आपल्याला कायम लांब ठेवलं. आपल्याला कायम डावलण्यात आलं अशी खदखद त्यांची होती. त्यांची नाराजी दूर करण्यासाठी उद्धव ठाकरे, संजय राऊत यांनी प्रयत्न केले परंतु त्यांची नाराजी काही दूर होऊ शकली नव्हती.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.