Manmad APMC : भुजबळांचा जुना शिलेदार भाजपमध्ये आल्यावरही सुहास कांदेंना नडला; अल्पमत असूनही झुंजवलं

Manmad APMC News : मनमाड कृषी उत्पन्न बाजार समितीचे सभापती दीपक गोगाड यांच्याविरोधात दाखल झालेला अविश्वास ठराव फेटाळण्यात आला आहे. शिवसेना आमदार सुहास कांदे यांच्या गटाच्या 11 संचालकांनी ठरावाच्या बाजूने मतदान केले. मात्र दीपक गोगाड यांनी शांत डोक्याने रचलेल्या डावपेचाने एका संचालकाला मतदानात भाग घेता आला नाही. परिणामी 12 संचालकांआभावी हा अविश्वास ठराव फेटाळण्यात आला.

गेले 6 महिन्यांपासून मनमाड बाजार समितीच्या सभापती पदावरून राजकीय संघर्ष सुरू आहे. सभापती दीपक गोगड मोठ्या प्रमाणात वादात सापडले आहे. प्रारंभी कर्मचाऱ्यांनी वेतन मिळत नसल्याने संप करून त्यांची कोंडी करण्याचा प्रयत्न केला होता. त्यानंतर बहुतांशी संचालक सुहास कांदे यांच्या गटात दाखल झाले होते. तेव्हापासून कांदे विरुद्ध गोगाड यांच्यात एकमेकांवर राजकीय कुरघोडी सुरु होती.

या कुरघोडीच्या राजकारणात गोगाड यांच्याविरुद्ध अविश्वास ठराव मंजूर करण्यासाठी कांदे गटाला 12 संचालकांची आवश्यकता होती. प्रत्यक्षात हे गणित जुळविण्यात आमदार कांदे यांना यश आले नाही. कांदेंच्या शिफारशीनंतर 18 जुलैला रमेश कराड यांची जिल्हाधिकाऱ्यांमार्फत संचालक म्हणून नियुक्ती झाली होती. त्यामुळे कांदे गटाकडे 12 संचालकांचे संख्याबळ झाले. त्यानंतर अविश्वास ठराव दाखल करण्यात आला होता.

मात्र, नुकतेच भाजपमध्ये दाखल झालेल्या दीपक गोगडे यांनी उच्च न्यायालयाच्या माध्यमातून सूत्र फिरवली. न्यायालयातून कराड यांची नियुक्ती रद्द झाली. परिणामी पुन्हा एकदा तांत्रिक मुद्द्यांवर 12 संख्याबळ गाठण्यात आमदार कांदे समर्थक कमी पडले. शुक्रवारी मनमाड बाजार समितीच्या सभागृहात दीपक गोगडे यांच्यावरील अविश्वास ठरावावर चर्चा झाली. पिठासीन अधिकारी बाबासाहेब गाढवे यांच्या उपस्थितीत चर्चा झाली. सभापती गोगड यांनी उच्च न्यायालयाचा आदेश सादर केला.

गोगाड यांनी अगदी ऐनवेळी उच्च न्यायालयाचा आदेश सादर केला. कराड यांना मतदानात भाग घेता आला नाही. अल्पमतात असूनही गोगड यांनी सभापती पद आपल्याकडे राखले. माजी आमदार संजय पवार, किशोर लहाने, दशरथ लहिरे, विठ्ठल आहेर, कैलास भाबड, सुभाष उगले, आप्पा कुंडगर, संगीता कराड, चंद्रकला डघळे, गंगाधर बिडकर आणि मधुकर उगले या 11 संचालकांनी सभापती गोगड यांच्यावरील अविश्वास ठरावाच्या बाजूने मतदान केले.

पण 12 संचालकांआभावी हा अविश्वास ठराव फेटाळण्यात आला. यामुळे सभापतीपद गोगड यांच्याकडे कायम राहिले आहे. मात्र काल अविश्वास ठरावाच्या कामकाजाच्या वेळी स्वतः गोगाड आणि गणेश धात्रक हे संचालक उपस्थित होते. त्यामुळे आमदार कांदे यांच्याकडे तालुक्याची सर्व सत्ता असली तरी या दोघा संचालकांनी त्यांना तांत्रिक आणि नियमांच्या आधारे झुंजवले.

आगामी काळात हा राजकीय वाद आणखी टोकाला जाण्याची शक्यता आहे. बाजार समितीत बहुमत आमदार कांदे समर्थक संचालकांचे तर सभापतीपदी दीपक गोगड हे आहेत. दीपक गोगाड यांनी देखील नुकतेच माजी खासदार समीर भुजबळ यांची साथ सोडत राजकीय सोय म्हणून भारतीय जनता पक्षात प्रवेश केला आहे. त्यामुळे अविश्वास ठरावाची प्रक्रिया आणि आगामी राजकारण दोन्हीही अतिशय रंजक होण्याची चिन्हे आहेत.