NCP SP News : स्थापनेपासून राष्ट्रवादीसोबत असलेल्या नेत्याने शरद पवारांची साथ सोडली; अनिल देशमुखांनाही धक्का

Nagpur, 30 May : घर फिरले की घराचे वासेही फिरतात, असे म्हटले जाते. नागपूर जिल्ह्यात राष्ट्रवादी काँग्रेस शरदचंद्र पवार पक्षाची अवस्था सध्या तशीच झाली आहे. राष्ट्रवादी काँग्रेसचे नेते आणि माजी गृहमंत्री अनिल देशमुख यांचा कट्टर समर्थक त्यांना सोडून चालला आहे. जिल्हा परिषदेचे माजी उपाध्यक्ष आणि नागपूर जिल्ह्याचे पक्षाचे उपाध्यक्ष चंद्रशेखर चिखले यांनी पक्षाचा राजीनामा दिला आहे. आपल्यावर नेत्यांचा विश्वास कमी झाल्याचे कारण त्यांनी दिले आहे. ते बहुतेक भाजपत जातील, असा कयास लावला जात आहे.

राष्ट्रवादी काँग्रेसच्या स्थापनेपासून चिखले पक्ष आणि अनिल देशमुख (Anil Deshmukh) यांच्यासोबत होते. देशमुख यांच्या काटोल विधानसभा मतदारसंघातील काटोल पंचायत समितीचे सभापती, जिल्हा परिषदेचे उपाध्यक्ष, जिल्हा नियोजन समितीचे सदस्य असा चिखले यांचा आजवरचा राजकीय प्रवास राहिलेला आहे. अनिल देशमुखांंना खंबीर साथ देणाऱ्या चिखले यांनी पक्ष सोडल्याने नागपुरात राष्ट्रवादीला मोठा धक्का बसल्याचे मानले जात आहे.

विधानसभेच्या निवडणुकीत अनिल देशमुख यांचे चिरंजीव सलील देशमुख, राष्ट्रवादी काँग्रेसचे (NCP) जिल्ह्यातील दुसरे नेते व माजी मंत्री रमेश बंग यांचा पराभव झाला आहे. काटोल विधानसभा मतदारसंघातून भाजपचे चरणसिंग ठाकूर निवडून आले आहेत. राज्यात भाजप महायुतीची सत्ता आहे. चंद्रशेखर बावनकुळे पालकमंत्री आहेत. नागपूर ग्रामीणमध्ये सहा पैकी पाच आमदार महायुतीचे आहेत.

आगामी जिल्हा परिषद आणि स्थानिक स्वराज्य संस्थेतही राष्ट्रवादी काँग्रेसचे काही खरे नाही, असे चित्र आहे. याचा अंदाज घेऊनच चिखले यांनी राष्ट्रवादी काँग्रेसला सोडचिठ्ठी दिली असल्याचे सांगण्यात येते. ते भाजपत जातील, अशीही चर्चा आहे. मात्र, अद्याप त्यांनी आपले पत्ते उघडे केलेले नाहीत. पुढे काय करायचे, ते ठरवू एवढे सांगून त्यांनी पक्ष व सर्व पदांचा राजीनामा दिला आहे.

चिखले यांच्यापूर्वी हिंगणा विधानसभा मतदारसंघातील राष्ट्रवादी काँग्रेसच्या जिल्हा परिषद सदस्य आणि माजी सभापती उज्ज्वला बोढारे यांनी आपल्या शेकडो समर्थकांसह भाजपत प्रवेश केला आहे. नागपूर जिल्ह्यातील महाविकास आघाडीचे चार माजी जिल्हा परिषद सदस्य यापूर्वीच भाजपात दाखल झाले आहेत.

नागपूर जिल्हा परिषदेचे माजी उपाध्यक्ष व माजी मंत्री सुनील केदारांचे एकेकाळचे खंदे समर्थक मनोहर कुंभारे यांच्या खांद्यावर भाजपचे मोठी जबाबदारी टाकली आहे. त्यांना जिल्हाध्यक्ष करण्यात आले असून तीन विधानसभा मतदारसंघाची जबाबदारी सोपविली सोपविली आहे. जिल्हा परिषद निवडणुकीच्या राजकीय सोयीसाठी नागपूर ग्रामीणमध्ये भाजपचे प्रथमच दोन जिल्हाध्यक्ष नियुक्त केले आहेत.