Guardian Minister : पालकमंत्री याच आठवड्यात जाहीर होणार, चंद्रशेखर बावनकुळे यांनी जाहीर केली तारीख

Nagpur News : महायुती सरकारची स्थापना आणि मंत्रिमंडळाचा विस्ताराला सुमारे एक महिना उलटून गेला असला, तरी अद्याप पालकमंत्र्यांच्या नियुक्त्या झालेल्या नाहीत. यावरून महायुतीमध्ये रस्सीखेच आणि आपसात स्पर्धा सुरू आहे.

याच कारणामुळे पालकमंत्र्यांच्या नियुक्त्या रखडल्या असल्याचे बोलले जात आहे. मात्र याबाबत भाजपचे प्रदेशाध्यक्ष आणि महसूलमंत्री चंद्रशेखर बावनकुळे यांनी मोठा खुलासा केला आहे. याच आठवड्यात पालकमंत्री जाहीर केले जाणार असल्याचे त्यांनी सांगितले.

चंद्रशेखर बावनकुळे म्हणाले, "येत्या 15 ते 16 जानेवारीपर्यंत पालकमंत्रीपदाचा विषय सुटलेला असेल. मुख्यमंत्री देवेंद्र फडणवीस, उपमुख्यमंत्री एकनाथ शिंदे (Eknath Shinde) आणि उपमुख्यमंत्री अजित पवार यांच्यासोबत आमच्या आतापर्यंत दोन ते तीन बैठका झाल्या आहेत. कोणाला कुठल्या जिल्ह्यात नियुक्त करायचे याचा निर्णय अंतिम टप्प्यात आहे". त्यामुळे 26 जानेवारीला झेंडा वंदन कोणी करायचे हा प्रश्न सुटलेला असले, असेही बावनकुळे यांनी सांगितले.

स्थानिक स्वराज्य संस्थांच्या निवडणुकीसाठी भाजप (BJP) तयार आहे. जेव्हा निवडणुका लागेल, त्यावेळी आम्ही पूर्ण ताकदीने मैदानात उतरू. कार्यकर्त्याच्या निवडणुकीत कार्यकर्त्यांसोबत जाऊन काम करू. भाजप नंबर एकच पक्ष आहे. असे असले, तरी महायुती म्हणून आम्ही निवडणुकीत पुढे जाऊ असेही त्यांनी स्पष्ट केले.

इंडिया आघाडी अविचारी

इंडिया आघाडी अविचारी असल्यामुळे ती जास्त काळ टिकणार नाही. तसेही या आघाडीचे भविष्य संपले आहे. महाराष्ट्रातील महाविकास आघाडीही संपल्यात जमा झाली आहे. शिवसेना उद्धव बाळासाहेब ठाकरे सेना पक्षाने महापालिकेची निवडणूक स्वबळावर लढणार असल्याचे जाहीर केले आहे. त्यांना आपली ताकद अजमावून बघायची असल्याचे संजय राऊत यांनी यापूर्वीच सांगितले आहे.

संजय राऊतांना टोला

संजय राऊत दिवसभर वटवट करीत असतात. ते पराभवाच्या मानसिकतेत आहे. अंधारात दिवा घेऊन फिरत आहे. आता त्यांचा वेळ संपला आहे. महाराष्ट्राची गद्दारी केली. पुढच्या काळात त्यांना भविष्य नाही. त्यांनी रोज टीव्हीसमोर येऊन तसेच सामानातून टीका करण्यापेक्षा आपला पक्ष वाढवावा, असा टोमणाही यावेळी बावनकुळे यांनी लगावला.