Nitin Raut vs BSP : ...म्हणून बहुजन समाज पार्टीमुळे वाढलं नितीन राऊतांचं टेन्शन?

Maharashtra Vidhansabha Election: लोकसभेच्या निवडणुकीत उत्तर नागपूर विधानसभा मतदारसंघाने काँग्रेसला सर्वाधिक मताधिक्य दिले होते. महाविकास आघाडीमुळे माजी मंत्री तसेच काँग्रेसचे उमेदवार यांना काही धोका नाही, असे मानल्या जात आहे. मात्र आता बहुजन समाज पार्टीने उमेदवार बदलल्याने त्यांचे टेन्शन वाढले आहे.

बसपाने बुद्धम राऊत यांना उमेदवारी जाहीर केली होती. आता त्यांच्याऐवजी माजी नगरसेवक मनोज सांगोळे यांना 'हत्ती'वर बसवण्यात आले आहे. २०१४च्या विधानसभेच्या निवडणुकीत बसपाचे तत्कालीन उमेदवार किशोर गजभिये यांच्यामुळे पराभवचा धक्का बसला होता. या निवडणुकीत भाजपचे मिलिंद माने निवडून आले होते. गजभिये दुसऱ्या तर नितीन राऊत तिसऱ्या क्रमांकावर फेकल्या गेले होते. त्यानंतरच्या निवडणुकीतून राऊत यांनी उत्तर नागपूरमध्ये पुन्हा कमबॅक केले.

२०१४च्या निवडणुकीत माने यांनी ६९ हजार, गजभिये यांनी ५५ हजार तर नितीन राऊत यांनी ५० हजार मते घेतली होती. २०१९च्या निवडणुकीत बसपाचे मताधिक्य निम्म्यावर आले. सुरेश साखरे यांनी २३ हजार मते घेतल्याने राऊत पुन्हा विजयी झाले होते. हे बघता बसपाच्या उमेदवारावर येथे भाजपच्या (BJP) विजयाचे भवितव्य अवलंबून असल्याचे दिसून येते.

बसपाचे(BSP) उमेदवार मनोज सांगोळे महापालिकेच्या निवडणुकीत पराभूत झाले असले तरी त्यांचा जनसंपर्क दांडगा आहे. नगरसेवक म्हणून लोकप्रिय होते. टंचाईच्या काळात टँकरवर बसून ते पाणी वाटप करीत होते.

नितीन राऊत(Nitin Raut) विरोधातील काँग्रेसची मते ते स्वतःकडे खेचून आणू शकतात. बसापचे कॅडर व्होट उत्तर नागपूरमध्ये भरपूर आहेत. बसपाचा ग्राफ सातत्याने खालावत असला तरी विधानसभेच्या निवडणुकीत मनोज सांगोळे तो वाढवू शकतात. असा बसपाला विश्वास आहे. मुस्लिमांना नागपूरमध्ये एकही जागा सोडण्यात आलेली नाही. त्यामुळे हा समाज काँग्रेसवर नाराज आहे. उत्तर नागपूरमध्ये मुस्लिम मतदारांची सख्याही निर्णायक आहे. याची गोळाबेरीज भाजप कशी करते यावरच उत्तर नागपूरचा निकाल अवलंबून राहणार आहे.

(Edited by - Mayur Ratnaparkhe)