Kanhan Municipal Election : निवडणुकीच्या मैदानात सासू विरुद्ध सून भिडणार; मुलगा हतबल! निकालाची उत्कंठा

Kanhan Municipal Election : नगरपालिकेच्या निवडणुकीत उमेदवारांची पळवापळी चांगलीच गाजत आहे. आता या पळवापळवीत राजकीय नेत्यांनी सासू-सुनेलाही सोडले नाही. राज्याचे अर्थ राज्यमंत्री आशिष जयस्वाल यांच्या रामेटक मतदारसंघातील कन्हान नगर पालिकेत काँग्रेसने तिकीट नाकारल्याने नाराज झालेल्या सासूलाच शिवसेनेने सुनेविरुद्ध उभे केल आहे. आता साऱ्यांचे लक्ष या लढतीत लागले आहे. सासू सुनेवर मात करते किती सून वरचढ ठरले निकालानंतर दिसून येणार आहे.

कन्हान पिपरी नगरपालिकेच्या निवडणुकीत हा प्रकार घडला आहे. सासू गुंफा तिकडे या काँग्रेसच्या नगरसेविका होत्या. त्यांना पुन्हा काँग्रेस तिकीट देईल अशी आशा होती. त्या पूर्ण जोमाने कामाला लागल्या होत्या. मात्र काँग्रेसने त्यांना डावलले. त्यांच्या ऐवजी सून दर्शना तिडके यांना उमेदवारी दिली. त्यामुळे सासू-सुनेमध्ये घरामध्ये भांडणे होऊ लागली.

मुरब्बी असलेल्या सासूने कुठलाही मागचा पुढचा विचार न करता थेट शिवसेनेचा दरवाजा ठोठावला. माजी नगरसेविका आयत्या चालून आल्याने शिवसेनेतही उत्साह संचारला. त्यांनी संधी सोडली नाही. सासूबाईंनी लगेच तिकटी जाहीर करण्यात आहे. सासू सुनेच्या भांडणात मात्र मुलाचे चांगलेच हाल चालू आहेत.

आईचा प्रचार करायचा का बायकोचा असा प्रश्न त्याला पडला आहे. शेवटी कोणीही जिंकले तरी सत्ता घरीच राहणार आहे. सासू गुंफा तिडके म्हणाल्या, काँग्रेसने आमच्या घरात भांडणे लावली. मी नगरसेविका होती. मला तिकीट नाकारण्याचे कारण नव्हते. मात्र काँग्रेसने सुनेला तिकीट दिले. आता आम्ही दोघींनी उमेदवारी दाखल केली आहे. सुनेला पराभूत केल्याशिवाय मी स्वस्थ बसणार नसल्याचे गुंफा तिडके म्हणाल्या.

आई मागील निवडणुकीत निवडून आल्या होत्या. त्यांच्या विजयासाठी आम्ही सर्वांनी प्रयत्न केले होते. त्यांच्या विजयात आमचाही मोठा वाटा आहे. मी सुरुवातीपासूनच समाजसेवेत सक्रिय आहे. माझ्या कामाची दखल घेऊनच काँग्रेसने मला तिकीट दिले. मात्र सासूबाईंनी राजकारणाच्या मोहापायी शिवसेनेत प्रवेश केला आणि घराचे दोन तुकडे केल्याचे सून दर्शना तिडके यांचे म्हणणे आहे.