Nagpur Politics : नागपूरमध्ये फोडफोडीला वेग, भाजपने काँग्रेसच्या महासचिवालाच पळवले...

Nagpur News, 11 Nov : महापालिका निवडणूक जवळ येताच उमेदवार आणि कार्यकर्त्यांच्या पळवापळवीला वेग आला आहे. काल काँग्रेसने उद्धव ठाकरेंच्या शिवसेना शहर प्रमुखाला फोडले तर आज भाजपने काँग्रेसच्या महासचिवाला पळवले.

विशेष म्हणजे महासचिव मिलिंद सोनटक्के हे एकेकाळी माजी मंत्री व उत्तर नागपूरचे आमदार नितीन राऊत यांचे खंदे समर्थक होते. त्यांच्यापासून दुरावल्यानंतर ते शहर काँग्रेसचे अध्यक्ष आमदार विकास ठाकरे यांच्या गोटात गेले होते. दोन्ही नेत्यांकडून उपेक्षा पदरी आल्यानंतर त्यांनी भाजपच प्रवेश करण्याचा निर्णय घेतला आहे.

अनुसूचित जातीसाठी राखीव असलेल्या उत्तर नागपूर विधानसभा मतदारसंघात अद्यापही भाजपला आपला जम बसवता आलेला नाही. लोकसभेच्या निवडणुकीत केंद्रीय मंत्री नितीन गडकरी यांना याच मतदारसंघातून मोठा फटका बसला होता. भाजपचे मिलिंद माने या मतदारसंघातून एकदा निवडून आले होते.

मात्र, त्यात बसपाचा वाटा मोठा आहे. बसपाने दुसऱ्या क्रमांकाची मते घेतल्याने मोठ्या प्रमाणात येथे विभाजन झाले होते. त्यात नितीन राऊत यांचा पराभव झाला होता. मात्र बसपाचा हत्ती मंद होताच पुन्हा एकदा काँग्रेसच्या राऊत यांनी हा मतदारसंघ आपल्या ताब्यात घेतला. दलित, मुस्लिम आणि ख्रिश्चन ही काँग्रेसची व्होट बँक आहे. त्याला आता धक्का बसायला सुरुवात झाली आहे.

शहर काँग्रेसचे महासचिव मिलिंद सोनटक्के यांच्यासह सचिव जॉन जोसफे पवन सोमकुवर हे मंगळवारी भाजपमध्ये प्रवेश करणार आहे. प्रभाग क्रमांक १ मध्ये मार्टिन नगर ही ख्रिश्चन बहुल वस्ती आहे. सुमारे साडेचार हजार ख्रिश्चन समाजाची लोकसंख्या आहे. येथील बहुतांश नेत्यांनी काँग्रेसला सोडून भाजपात प्रवेश केला आहे. हा काँग्रेससाठी मोठा धक्का मानला जातो.

सोनटक्के आपल्या समर्थकांसह भाजपमध्ये जाणार असल्याची चर्चा चार दिवसांपासून शहरात होती. स्वतः सोनटक्के यांनी आपल्या 'डीपी'वर स्टेटस ठेवले होते. मात्र, त्यांच्याशी कोणी चर्चा केली नाही. थांबवण्याचे प्रयत्न केले नाही. काँग्रेसच्या एका नेत्यांना सोनटक्के यांचा भाजप जाण्याचा वैयक्तिक निर्णय आहे. त्यामुळे फारकाही फरक पडणार नाही अशी प्रतिक्रिया दिली आहे.