Nagpur News, 10 Jul : महापालिकेच्या निवडणुकांमध्ये महाविकास आघाडी होणार की नाही हे आताच सांगता येत नसले तरी नागपूरमध्ये काँग्रेस आणि ठाकरेंच्या शिवसेनेचे नेते एकमेकांच्या संपर्कात आहेत.
यामुळे आघाडीची आशा वाढली आहे. ठाकरेंच्या शिवसेनेचे प्रारंभिक बैठकीत 30 जागांची मागणी केल्याचं सांगितलं जात आहे. तर काँग्रेसने अद्याप आकडा फिक्स केला नसला तरी सकारात्मक प्रतिसाद दिला आहे.
त्यामुळे हे दोन्ही पक्ष एकमेकांना टाळी देण्यास उत्सुक असल्याचं चित्र सध्या तरी दिसत आहे. नागपूर महापालिकेत मीगल पंधरा वर्षांपासून भाजप सत्तेवर आहे. मागील निवडणुकीत भाजपचे विक्रमी 108 नगरसेवक निवडून आले होते. या झंझावातात काँग्रेससह सर्वच पक्षांची दाणादाण उडाली होती.
काँग्रेस 29 नगरसेवकांवर थांबली तर ठाकरेंची शिवसेना 2, राष्ट्रवादीचा एकच नगरसेवक निवडून आला होता. बसपाचे 10 नगरसेवक निवडून आले होते. यावेळी भाजपने 130 नगरसेवक विजयी करण्याचं टार्गेट ठरवलं आहे. त्यांना रोखण्यासाठी काँग्रेसला यावेळी तडजोड करावी लागणार असल्याचे दिसून येतं आहे.
आठ वर्षांपूर्वी विकास ठाकरे यांच्या नेतृत्वात महापालिकेची निवडणूक काँग्रेसने लढवली होती. सध्या विकास ठाकरे हेच शहर काँग्रेसचे अध्यक्ष आहेत. नागपूर शहरात काँग्रेस आणि शिवसेनेच्या नेत्यांचे कधीच फारसे पटले नाही. त्यात दुष्यंत चतुर्वेदी यांच्याकडे ठाकरेसेनेने शहराची धुरा सोपवल्यानंतर संबंध आणखी बिघडले होते.
ठाकरे आणि काँग्रेसचे ज्येष्ठ नेते, माजी मंत्री सतीश चतुर्वेदी हे कट्टर राजकीय वैरी होते. या दोन्ही गटाच्या भांडणामुळेच काँग्रेसचे पानिपत झाले. दुष्यंत चतुर्वेदी आता शिंदे सेनेत गेले आहेत. त्यांच्या जागेवर संपर्क प्रमुख म्हणून सतीश हरडे यांची नियुक्ती करण्यात आली आहे. हरडे हे एकेकाळचे काँग्रेसचे कार्यकर्ते आहेत.
ठाकरे आणि हरडे हे माजी केंद्रीयमंत्री विलास मुत्तेवार यांचे कट्टर समर्थक होते. हरडे यांनी सुमारे वीस वर्षांपर्वी काँग्रेस सोडून शिवसेनेत प्रवेश केला. आता त्यांना उद्धव ठाकरे यांनी पुन्हा शहराची जबाबदारी सोपवली आहे. हरडे यांनी ठाकरे यांच्याकडे मैत्रीचा हात पुढे केला असल्याचा समजते.
काँग्रेस आणि ठाकरेंची शिवसेना एकत्र लाढल्यास सेनेलाही अपेक्षित आकडा गाठता येणार आहे. त्यांचे दोन नगरसेवक मागील निवडणुकीत निवडून आले होते. आठ उमेदवार दुसऱ्या क्रमांकावर होते. याशिवाय इतर प्रभांगामध्ये विजाभज टाळल्या काँग्रेसचाही फायदा होऊ शकतो असाही अंदाज बांधला जात आहे.
सरकारनामाचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Latest Marathi Political News, Breaking Political News from Maharashtra, India, Pune & Mumbai at Sarkarnama. To Get Live Political Marathi News on Mobile, Download the Sarkarnama Mobile App for Android and IOS. सरकारनामा आता सर्व सोशल मीडिया प्लॅटफॉर्मवर. ताज्या राजकीय घडामोडींसाठी फेसबुक, ट्विटर, इन्स्टाग्राम, शेअर चॅट, टेलिग्रामवर आणि व्हॉट्सॲप आम्हाला फॉलो करा. तसेच, सरकारनामा यूट्यूब चॅनेलला आजच सबस्क्राइब करा.