Dollar at 100 Rupees : डॉलर 100 रुपयांवर गेला, तर मोदींचा जाहीर सत्कार करणार; माजी राज्यमंत्र्यांचे उपरोधिक पत्र चर्चेत

Subodh Savji letter to Modi : आखाती देशांतील युद्धजन्य परिस्थिती, जागतिक आर्थिक अस्थिरता आणि वाढत्या इंधन दरांच्या पार्श्वभूमीवर भारतीय अर्थव्यवस्थेवर मोठा ताण निर्माण झाल्याचे चित्र आहे.

अमेरिकन डॉलरच्या तुलनेत रुपयाची घसरण कायम असून, देशातील अनेक भागांत इंधन टंचाईची समस्या देखील गंभीर बनत चालली आहे. पेट्रोल-डिझेलसाठी शेतकरी आणि सर्वसामान्य नागरिक रांगेत उभे असल्याचे चित्र अनेक ठिकाणी पाहायला मिळत आहे.

याच पार्श्वभूमीवर बुलढाणा इथले माजी राज्यमंत्री सुबोध सावजी यांनी पंतप्रधान नरेंद्र मोदी (Narendra Modi) यांना एक उपरोधिक पत्र लिहून राजकीय वर्तुळात खळबळ उडवली आहे. “ज्या दिवशी एका अमेरिकन डॉलरची किंमत 100 रुपये होईल, त्या दिवशी आम्ही पंतप्रधान नरेंद्र मोदी यांचा जाहीर सत्कार करू,” अशी घोषणा सावजी यांनी केली आहे.

सध्या आंतरराष्ट्रीय बाजारात एका अमेरिकन डॉलरचा दर सुमारे 95.85 ते 96.20 रुपयांच्या दरम्यान पोहोचला आहे. अमेरिकन डॉलरची जागतिक मजबुती, कच्च्या तेलाच्या वाढत्या किमती आणि भू-राजकीय तणावामुळे भारतीय रुपयावर दबाव वाढत असल्याचे आर्थिक (Economy) तज्ज्ञांचे मत आहे.

सुबोध सावजी यांनी पत्रात केंद्र सरकारच्या आर्थिक धोरणांवर आणि भाजपवर जोरदार टीका केली आहे. “भारताच्या इतिहासात ज्या दिवशी एका डॉलरची किंमत 100 रुपये होईल, तो दिवस सुवर्ण अक्षरांनी लिहून ठेवण्यासारखा असेल,” असा उपरोधिक उल्लेख त्यांनी केला.

त्यांनी पुढे म्हटले आहे की, “गेल्या 70 वर्षांत काँग्रेसला जे जमले नाही, तो बहुमान आता आपल्या नेतृत्वाखाली देशाला मिळणार आहे. जातीयवाद, धर्मवाद आणि जुमलेबाजीच्या जोरावर सरकारे स्थापन होत असताना सर्वसामान्य जनता मात्र महागाई आणि आर्थिक संकटाने त्रस्त झाली आहे.”

सावजी यांनी पत्रात आणखी एक पाऊल पुढे टाकत, “एका डॉलरची किंमत 100 रुपये झाल्यानंतर आपण आम्हाला वेळ आणि तारीख द्यावी. आम्ही दिल्लीमध्ये आपल्या पदाला साजेशा पद्धतीने स्वखर्चाने भव्य सत्कार करू,” असेही नमूद केले आहे.

रुपयाच्या घसरणीवरून केंद्र सरकारवर विरोधक सातत्याने टीका करत असताना, सुबोध सावजी यांच्या या पत्रामुळे राज्यातील राजकीय वातावरण आणखी तापण्याची शक्यता व्यक्त केली जात आहे.