Lok Sabha Election 2024 : विजय वडेट्टीवारांचे नेमके चाललेय काय?

Lok Sabha Election 2024 : आतापर्यंत राज्याचे राजकारण गाजविणारे काँग्रेसचे दिग्गज नेते तथा विधानसभेचे विरोधी पक्षनेते विजय वडेट्टीवार आता लोकसभा निवडणुकीच्या तयारीला लागल्याचे बोलले जात आहे. वडेट्टीवार यांनी चंद्रपूर लोकसभा लढवण्याचे संकेत दिले आहेत. सध्या त्यांचे ‘विजयदूत’ चंद्रपुरातील प्रत्येक घरातील मतदाराशी संपर्क साधत आहेत. त्यातून वडेट्टीवार यांनी मंत्री असताना व आता विरोधी पक्षनेता असताना कोणती कामे केली याची माहिती दिली जात आहे. वडेट्टीवार हे चंद्रपुरातून लोकसभा निवडणुकीसाठी इच्छुक असले तरी पक्ष निर्णय देईल तेच करणार असल्याचे त्यांनी स्पष्ट केले आहे.

2019 मध्ये देशभरात मोदी लाट असताना चंद्रपुरातून बाळू धानोरकर हे विजयी झाले होते. संपूर्ण महाराष्ट्रातून धानोरकर यांच्या रूपाने काँग्रेसला केवळ एकच जागा मिळाली होती. बाळू धानोरकर यांच्या निधनानंतर आता त्यांच्या पत्नी प्रतिभा धानोरकर यांना या जागेवरून निवडणूक लढविण्याची इच्छा आहे. परंतु विजय वडेट्टीवार यांनी या मतदारसंघावर दावा केल्यास काँग्रेसपुढे मोठा पेच निर्माण होणार आहे. काँग्रेसमध्ये सगळ्यात बाबींचा विचार केल्यास विजय वडेट्टीवार यांचे पारडे जड ठरणार आहे. त्यामुळे वडेट्टीवार यांनी आपल्या पद्धतीने निवडणुकीची तयारी सुरू केली आहे.

(राजकारणातील महत्त्वाच्या बातम्यांचे अपडेट्ससाठी सरकारनामाचे अधिकृत WhatsApp चॅनल फॉलो करा!)

वडेट्टीवार यांच्या कन्या शिवानी या सुरुवातीपासूनच काँग्रेसमध्ये सक्रिय आहेत. चंद्रपूर जिल्ह्यात त्यांचे संपर्क दौरे सुरूच असतात. त्यामुळे विजय वडेट्टीवार यांना लोकसभेची उमेदवारी मिळाल्यास त्यांच्या जागेवर शिवानी वडेट्टीवार यांना विधानसभा निवडणुकीची उमेदवारी मिळावी, यासाठी त्यांचा प्रयत्न राहणार आहे. विजय वडेट्टीवार यांच्या या भूमिकेळे चंद्रपूरच्या राजकारणात नवा ट्विस्ट आला आहे. विजय वडेट्टीवार हे चंद्रपूर जिल्ह्यातील ब्रह्मपुरी विधानसभा मतदारसंघाचे नेतृत्व करतात. हा मतदारसंघ त्यांच्यासाठी अतिशय सुरक्षित मानला जातो. त्यांची कन्या शिवानी याही आता राजकारणात सक्रिय झाल्या आहेत. त्यांचा ब्रह्मपुरी मतदारसंघातील वावर वाढला आहे. त्यामुळे शिवानी यांच्याकडे विधानसभा मतदारसंघाची जबाबदारी सोपवून विजय वडेट्टीवार स्वतः लोकसभेच्या रिंगणात उतरतील असा अंदाज आहे.

प्रतिभा धानोरकरही तयारीत

बाळू धानोरकर यांच्या पत्नी तथा वरोरा विधानसभा मतदारसंघाच्या विद्यमान आमदार प्रतिभा धानोरकर यांनी लोकसभा निवडणूक लढवण्याची इच्छा व्यक्त केली आहे. त्यांनी तशी काँग्रेसकडे मागणीही केली आहे. पक्षाने संधी दिली तर माझी लोकसभा निवडणूक लढवण्याची तयारी आहे. पक्षाकडे उमेदवारी मागण्याचा अधिकार सर्वांना आहे, पण शेवटी पक्ष जो निर्णय घेईल तो मला मान्य असेल, असे वडेट्टीवार यांनी म्हटले आहे.

Edited By : Prasannaa Jakate

R