Vote Chori : उपराष्ट्रपती सी पी राधाकृष्णन यांची निवड व्होट चोरीतून; काळा पैसा, ब्लॅकमेलिंगचा वापर ठाकरेंच्या शिवसेनेचा हल्लाबोल

Shivsena UBT News : उपराष्ट्रपतीपदाच्या निवडणुकीत एनडीचे उमेदवार सी पी राधाकृष्णन विजयी झाले. तर, विरोधी पक्षाचे उमेदवार बी. सुदर्शन रेड्डी पराभूत झाले. मात्र, या निवडणुकीत विरोधकांची 15 मतं फूटल्याची चर्चा आहे. महाराष्ट्रातील खासदार फूटले, आपचे खासदार फूटले अशी चर्चा आहे. त्यावरून शिवसेना उद्धव बाळासाहेब ठाकरे पक्षाचे मुखपत्र असलेल्या 'सामना'च्या अग्रलेखातून भाजपवर हल्लाबोल करण्यात आला आहे.

'मुख्यमंत्री देवेंद्र फडणवीस यांनी नेहमीप्रमाणे राधाकृष्णन यांच्या विजयाचे श्रेय स्वतःकडे घेतलेच. महाविकास आघाडीला स्वतःची मते राखता आली नाहीत वगैरे भाष्य केले. मिंधे गटाचे लोक म्हणतात, महाविकास आघाडीत फूट पाडून आम्ही खासदारांची मते राधाकृष्णन यांच्याकडे वळवली, देशाच्या संवैधानिक पदासाठीम्हणजे उपराष्ट्रपतीपदासाठी झालेल्या निवडणुकीत या लोकांनी सौदेबाजार केल्याची कबुली दिली.', असे 'सामना'तून म्हटले आहे.

पुढे म्हटले आहे की, 'या लोकांनी सौदेबाजार केल्याची कबुली दिली असेल तर भारताचा निवडणूक आयोग घोरत पडला आहे काय? निवडणूक आयोग उपराष्ट्रपतीपदाच्या निवडणुकांतही गांभीर्याने काम करीत नाही. व्होट चोरीचा खेळ येथेही होऊ दिला जातोय. हे असे खरेच घडले असे एकवेळ मान्य केले तर संघाचे उमेदवार असलेले सी. पी. राधाकृष्णन यांची उपराष्ट्रपतीपदी झालेली निवड व्होट चोरीतून झाली आहे. त्यासाठी काळा पैसा, ब्लॅकमेलिंग, धमक्यांचा वापर झाला.'

बेइमानीचे शेण खाल्ले नाही

मतदान हे पूर्णपणे गुप्त असताना अशा महत्त्वाच्या निवडणुकीत 'मते' फोडणे हे भाजप काळात किती सोपे बनले आहे ते यावेळी दिसले. भाजप व त्यांचे मित्रपक्ष 'फोडाफोडी'वर कितीही बोलत असले तरी दोन-पाच वगळता इतर कोणी बेइमानीचे शेण खाल्ले असेल असे दिसत नाही. ज्यांनी 'क्रॉस व्होटिंग' केले त्या अंतरात्म्यांच्या आत्मारामांनी म्हणे तत्काळ परदेश गमन केले व त्यांच्या परदेशवारीची सर्व व्यवस्था भाजपच्या लाडक्या उद्योगपतींनी केल्याची वार्ता भाजप गोटातूनच वाऱ्यासारखी पसरवली गेली. हेसुद्धा उपराष्ट्रपतीपदाच्या निवडणुकीची प्रतिष्ठा राखणारे नाही, असे देखील अग्रलेखात म्हटले आहे.