ZP Election update : उमेदवारी अर्ज भरण्याची मुदत संपताच चिन्हांबाबत निवडणूक आयोगाचा मोठा निर्णय़; नव्या नियमाने फायदा की तोटा?

Election Commission decision : राज्यात १२ जिल्हा परिषदा १२५ पंचायत समित्यांच्या निवडणुकांची धामधूम सुरू आहे. आज उमेदवारी अर्ज भरण्याची अंतिम मुदत होती. ही ही मुदत संपताच राज्य निवडणूक आयोगाने चिन्ह वाटपाबाबत मोठा निर्णय घेतला आहे. नोंदणीकृत अमान्यताप्राप्त राजकीय पक्षाचे उमेदवार व अपक्ष उमदवारांना चिन्ह वाटपाबाबतच्या आधीच्या निर्णयात बदल केला आहे.

आयोगाने आज याबाबतचा सुधारित आदेश काढला आहे. स्थानिक स्वराज्य संस्थांच्या निवडणुकीत नोंदणीकृत अमान्यताप्राप्त पक्ष आणि अपक्ष उमेदवारांना उमेदवारी अर्ज दाखल करताना मुक्त चिन्हे म्हणून जास्तीत जास्त कोणत्याही तीन चिन्हांची प्राध्यान्यक्रमानुसार मागणी करता येते. चिन्ह वाटपात पक्षांना प्राधान्य दिले जाते.

जिल्हा परिषद व पंचायत समितीच्या निवडणुका एकाच वेळी होत आहेत. एखाद्या नोंदणीकृत अमान्यताप्राप्त राजकीय पक्षाच्या उमेदवारास एका जिल्हा परिषद विभागासाठी मुक्त चिन्हाचे वाटप केल्यास त्याच पक्षाच्या उमेदवारास त्यांच्या उमेदवारी अर्जातील मागणीनुसार त्या जिल्हा परिषद विभागांतर्गत येणाऱ्या दोन्ही पंचायत समिती गणासाठीदेखील झेडपी विभागासाठी वाटप करण्यात आलेले मुक्त चिन्ह देण्यात येईल, असे आयोगाने म्हटले आहे.

नोदंणीकृत अमान्यताप्राप्त दोन पक्षांच्या उमेदवारांनी एकाच चिन्हावर दावा केलेला असल्यास त्यांच्या चिठ्ठ्या काढल्या जातील. त्यानुसार चिन्हाचे वाटप होईल. हेच चिन्ह संबंधित जिल्हा परिषद विभागातील दोन्ही पंचायत समिच्या गणांमधील संबंधित पक्षाच्या उमेदवारांनाही मिळेल.

जिल्हा परिषद विभागासाठी एखाद्या अपक्ष उमेदवारास मुक्त चिन्हाचे वाटप केल्यास त्या उमेदवाराला त्याच जिल्हा परिषद विभागांतर्गत येणाऱ्या पंचायत समितीच्या निर्वाचक गणासाठीही निवडणूक लढवत असल्यास त्या अपक्ष उमेदवाराला त्याच्या उमेदवारी अर्जातील मागणीनुसार झेडपी विभागासाठी मिळालेले चिन्हच देण्यात येईल. असे चिन्हे जिल्हा परिषद विभाग किंवा पंचायत समितीच्या अन्य गणांसाठी कुणालाही दिले जाणार नाही, असे आयोगाने स्पष्ट केले आहे.