Sanjay Raut on BJP : "फडणवीस अर्धवट ज्ञानी, गुडघ्यात सुद्धा मेंदू नाही"; जावेद मियाँदादच्या मातोश्री भेटीची आठवण करून देताच राऊत भडकले, भेटीचा तपशीलच सांगितला

Mumbai News, 24 Aug : आशिया कप 2025 स्पर्धेत भारताच्या टीमला पाकिस्तानसोबत खेळण्यास केंद्र सरकारने मंजूरी दिली आहे. यावरून ठाकरेंच्या शिवसेनेचे खासदार संजय राऊत यांनी थेट पंतप्रधान नरेंद्र मोदींना पत्र लिहित अनेक प्रश्न उपस्थित केले होते.

शिवाय आपण पाकिस्तानसोबत क्रिकेट खेळलो नाही तर व्यापार थांबवण्याची धमकी राष्ट्राध्यक्ष ट्रम्प यांनी दिली आहे का? असा टोलाही राऊतांनी पत्रातून लगावला होता. राऊतांच्या याच पत्रावर प्रतिक्रिया देताना राज्याचे मुख्यमंत्री देवेंद्र फडणवीस यांनी जावेद मियाँदाद मातोश्रीवर आल्याची आठवण करून देत ठाकरेंच्या शिवसेनेवर टीका केली.

आता फडणवीसांच्या याच टीकेला उत्तर देताना खासदार संजय राऊत चांगलेच संतापल्याचं पाहायला मिळालं. संजय राऊत म्हणाले, "देवेंद्र फडणवीस अर्धवट ज्ञानी असून त्यांच्या गुडघ्यात सुद्धा मेंदू नाही. मियाँदाद मातोश्रीवर आला तेव्हा काय घडलं होतं ते दिलीप वेंगसरकर यांना विचारा."

शिवाय फडणवीसांनी मी बनवलेला ठाकरे चित्रपट पाहिला पाहिजे. ठाकरेंच्या तेव्हाच्या मुलाखती सुद्धा समजावून घेतल्या पाहिजेत. जावेद मियाँदाद मातोश्रीवर बाळासाहेबांना भारत-पाकिस्तान क्रिकेटला विरोध करू नका हे सांगण्यासाठी आला होता.

मात्र, बाळासाहेबांनी त्याला चहा घ्या आणि निघून जा, दहशतवाद आणि क्रिकेट एकत्र चालणार नाही अशा शब्दात सांगितलं होतं. मात्र मोदींप्रमाणे बाळासाहेबांनी शेपूट घातली नव्हती. जर तुम्हाला कुंकवाची कदर असेल, तर तुम्ही अशी विधाने करणार नाही.

तुम्ही फक्त एकच सांगा पाकिस्तानविरुद्ध क्रिकेट खेळण्यासाठी तुमचा पाठिंबा आहे की नाही? पैशांसाठी तुम्ही पाकड्यांसमोर शेपूट घातली, असा हल्लाबोल संजय राऊत यांनी केला आहे.