Sharad Pawar : अजितदादांची साथ सोडलेले नरेंद्र राणे तुतारी फुंकणार; शरद पवारांची मुंबईतील ताकद वाढणार

Mumbai : विधानसभा निवडणुकीच्य रणधुणाळीत उपमुख्यमंत्री अजित पवार यांची साथ सोडणार नरेंद्र राणे तुतारी फुंकणार आहेत. ते बुधवारी दुपारी मुंबईत राष्ट्रवादी काँग्रेस शरदचंद्र पवार पक्षात प्रवेश करणार आहेत. त्यामुळे शरद पवारांची मुंबईतील ताकद वाढली आहे.   

नरेंद्र राणे हे अजित पवार यांच्या राष्ट्रवादीचे मुंबई कार्याध्यक्ष होते. त्यांनी काही दिवसांपूर्वीच वाय. बी. चव्हाण सेंटर येथे शरद पवारांची भेट घेतली होती. यावेळी त्यांच्यासोबत अजितदादांच्या राष्ट्रवादीचे प्रमुख पदाधिकारी विलास माने, दिनकर तावडे आणि विजय देसाई हेही होते. आज चौघेही शरद पवारांच्या पक्षात प्रवेश करणार असल्याचे समजते.

दरम्यान, राज्यात विधानसभा निवडणुकीसाठी उमेदवारांची नावे जाहीर होताच अनेकांनी बंडखोरी करत पक्ष बदलले आहेत. सर्वच पक्षांना बंडखोरीचे ग्रहण लागले आहे. अनेक नेत्यांनी इतर पक्षांत प्रवेश करत उमेदवारी पदरात पाडून घेतली आहे. भाजप, काँग्रेस, दोन्ही शिवसेना आणि राष्ट्रवादीलाही त्याचा फटका बसला आहे.

लोकसभा निवडणुकीत महाविकास आघाडीला मिळालेल्या यशानंतर आघाडीतील पक्षांकडे इतर पक्षांतील नेत्यांचा ओघ वाढला होता. प्रामुख्याने शरद पवारांच्या पक्षामध्ये अनेक बड्या नेत्यांनी प्रवेश करत उमेदवारी मिळवली आहे. त्यामध्ये हर्षवर्धन पाटील, समरजित घाटगे, आमदार राजेंद्र शिंगणे यांच्यासह इतर नेत्यांनी शरद पवारांची साथ दिली आहे.