Bhiwandi Building Collapse : 'लगेच बाहेर पडा...', अधिकाऱ्याच्या एका धाडसाने वाचले अनेक जीव; पुढच्या 10 मिनिटांतच कोसळली इमारत

Bhiwandi News : भिवंडीतील भीषण इमारत दुर्घटनेत 10 जणांचा दुर्दैवी मृत्यू झाला. मात्र महापालिकेचे सहाय्यक आयुक्त अरविंद घोगरे यांच्या प्रसंगावधानामुळे आणखी मोठी जीवितहानी टळल्याची माहिती समोर आली आहे.

इमारतीला तडे जात असल्याची माहिती मिळताच त्यांनी स्वतः घटनास्थळी धाव घेत रहिवाशांना बाहेर काढले. विशेष म्हणजे, घोगरे इमारतीबाहेर पडल्यानंतर अवघ्या दहा मिनिटांत इमारत कोसळली.

सायंकाळी सहा वाजल्यापासून इमारतीला तडे जाऊ लागल्याचे लक्षात आल्यानंतर स्थानिक नगरसेवक यशवंत टावरे यांनी प्रभाग समिती क्रमांक ४ चे सहाय्यक आयुक्त अरविंद घोगरे यांना माहिती दिली. रात्री साडेदहाच्या सुमारास घोगरे हे कर्मचारी सुमीत जाधव यांच्यासह घटनास्थळी पोहोचले.

परिस्थितीची गंभीरता ओळखून घोगरे यांनी कोणतीही जोखीम न पत्करता थेट इमारतीच्या चौथ्या मजल्यापर्यंत जाऊन रहिवाशांना तातडीने बाहेर पडण्याचे आवाहन केले. त्यांनी आणि त्यांच्या सहकाऱ्यांनी अनेक कुटुंबांना सुरक्षितपणे बाहेर काढण्यात मदत केली. त्यांच्या सूचनेनंतर रहिवाशांनी तातडीने इमारत रिकामी केली.

रहिवाशांना सुरक्षित बाहेर काढून घोगरे स्वतः इमारतीबाहेर पडले आणि अवघ्या दहा मिनिटांत संपूर्ण इमारत जमीनदोस्त झाली. या धाडसी आणि वेळेवर केलेल्या कारवाईमुळे संभाव्य मोठी जीवितहानी टळल्याचे बोलले जात आहे. मात्र, या दुर्घटनेत १० जणांचा मृत्यू झाल्याने परिसरात शोककळा पसरली आहे.