MU Senate Election : मोठी बातमी ! मुंबई विद्यापीठ सिनेट निवडणुकीला अचानक स्थगिती; कारण मात्र गुलदस्त्यात..

Mumbai News : मुंबई विद्यापीठाकडून जाहीर करण्यात आलेल्या सिनेट निवडणुका अचानकपणे स्थगित केल्या आहेत. पुढील आदेश प्राप्त होईपर्यंत स्थगितीचा निर्णय घेण्यात आला आहे. विद्यापीठाच्या या निर्णयामुळे आता तीव्र नाराजी व्यक्त करण्यात येत आहे. मागील आठवड्यात ९ ऑगस्ट रोजी मुंबई विद्यापीठाकडून सिनेट निवडणुका जाहीर करण्यात आल्या होत्या. मात्र आता तडकाफडकी या निवडणुका स्थगित केल्याने राजकीय वर्तुळात चर्चांना उधाण आले आहे. (Latest Marathi News)

मुंबई विद्यापीठाने यापूर्वी जाहीर केलेल्या सिनेट निवडणुकांमध्ये उमेदवारांना अर्ज भरण्यासाठी शुक्रवार 18 ऑगस्ट 2023 अशी अंतिम मुदत देण्यात आली होती. तर १३ सप्टेंबर रोजी या निवडणुकांचा निकाल लागणार होता. मात्र ऐनवेळी या सिनेट निवडणुकीच्या कार्यक्रमाला स्थगिती देण्यात आली आहे. राजकीय पक्ष, तसेच विद्यार्थी संघटनांकडून या निवडणुकांसाठी जोरदार तयारी करण्यात येत होती. मात्र आता निवडणुकाच स्थगित झाल्याने नाराजी व्यक्त केली जात आहे.

निवडणुका स्थगितीचे कारण काय?

या निवडणुका जाहीर करणाऱ्या मुंबई विद्यापीठ व्यवस्थापन परिषेदेने अचानकपणे निवडणुकांना स्थगिती दिली. मात्र स्थगिती देण्याचे कारण अजूनही स्पष्ट केले नाही. निवडणुका स्थगितीबाबत काढलेल्या परिपत्रकामध्ये कोणतेही ठोस कारण दिले गेले नाही. शिवाय यामागचे कारणही परिषेदेने माध्यमांना सांगितले नाही, त्यामुळे या घेतलेल्या निर्णयावर जोरदार चर्चा होत आहे.