Bjp First Mumbai Mayor : मुंबईत पहिल्यांदाच नाही तर दुसऱ्यांदा होणार भाजपचा महापौर! 1982 मध्ये रचला होता इतिहास

Mumbai Mayor : मुंबई महापालिका निवडणुकीत भाजपला 89 जागा मिळाल्या आहेत. शिंदेंच्या शिवसेनेसोबत भाजपची युती होती. त्यामुळे भाजपचा महापौर मुंबईत होणार आहे. त्यामुळे माध्यमांमध्ये मुंबई महापालिकेत पहिल्यांदाच मुंबईचा महापौर होणार असल्याची चर्चा आहे.

मात्र, मुंबईत या पूर्वी देखील भाजपचा महापौर होता, असे स्पष्ट झाले आहे. त्यामुळे पहिल्यांदा नाही तर दुसऱ्यांदा भाजपचा नगरसेवक मुंबईचा महापौर होणार असल्याचे सांगितले जाते. 1982 मध्येच डॉ. प्रभाकर संजीव पै हे भाजपचे नेते मुंबईचे महापौर झाले होते.

ज्येष्ठ पत्रकार प्रकाश अकोलकर यांनी फेसबूक पोस्ट करत या विषयी माहिती दिली आहे. त्यांनी आपल्या पोस्टमध्ये म्हटले आहे की, मुंबईच्या महापौर पदासाठी भारतीय जनता पक्ष आणि एकनाथ शिंदे यांची सेना यांच्यात चाललेल्या अकटोविकट संघर्षात भाजपला महापौर पद मिळालेच तर जो कोणी महापौर होईल तो भारतीय जनता पक्षाचा दुसरा महापौर असेल.

'1982 मध्येच डॉक्टर प्रभाकर संजीवा पै हे मुंबईचे महापौर झाले होते आणि ते भारतीय जनता पक्षाचे निष्ठावान नेते होते याची आठवण तेव्हा त्या महापौर कार्यालयात कार्यरत असलेले ज्येष्ठ अधिकारी प्रकाश परांजपे शहापूरकर यांनी करून दिली.', असे देखील अकोलकर यांनी आपल्या पोस्टमध्ये म्हटले आहे.

अकोलकर यांनी पै यांच्याविषयी आठवणी सांगताना म्हटले की, 'पै महापौर असतानाच्या काळात राष्ट्रीय स्वयंसेवक संघाचे एक शिबीर झाले होते. त्या शिबिरास महापौर असलेले पै हे संघाचे अर्धी चड्डी घालून उपस्थित होते आणि त्यांच्या समवेत तिथे परांजपेही गेले होते.'