Mumbai Zoo Penguin Controversy : पेंग्विन पिल्लांच्या नावांवरून राजकारण तापलं; भाजप म्हणतं, इंग्रजीत नावं का?

Marathi Names For Byculla Zoo Penguins: मुंबईतील वीरमाता जिजाबाई भोसले प्राणिसंग्रहालयात म्हणजेच, राणीबागेत जन्मलेल्या पेंग्विन पिल्लांना नावं देण्यावरून राजकारण तापलं आहे. या पिल्लांना मराठीच नावं देण्यासाठी भाजपनं आंदोलनाचं हत्यार उपसलं.

राणीबागेसमोर भाजपने केलेल्या आंदोलनावर शिवसेना उद्धव बाळासाहेब ठाकरे सेनेने चिमटा काढत डिवचलं आहे. भाजप नाकर्तेपणा झाकण्यासाठी आंदोलनाचे उद्योग करत असल्याचा टोला शिवसेना ठाकरे सेनेने लगावला आहे.

मुंबईतील (Mumbai) वीरमाता जिजाबाई भोसले प्राणिसंग्रहालयात म्हणजेच राणीबागेतील नवीन पेंग्विनची नावे ‘नॉडी’, ‘टॉम’ आणि ‘पिंगू’ अशी आहेत. या तिन्ही पेंग्विन पिल्लांची नावे इंग्रजीमध्ये आहेत. भाजपने या पिल्लांना मराठी नावे देण्याची मागणी केली आहे.

जन्माला आलेल्या पेंग्विन पिल्लांची नावे इंग्रजी भाषेत दिल्यावरून भाजप चांगलाच आक्रमक झाला आहे. भाजपचे (BJP) नितीन बनकर यांनी बाग प्रशासनला 30 एप्रिलला पत्र देत, पेंग्विनच्या पिलांची इंग्रजी नावे काढून मराठी भाषेत त्यांचे नामकरण करावे, अशी मागणी केली.

मराठी भाषेत नावे देण्यासाठी भाजप तीव्र आंदोलन करेल, असा इशारा देखील भाजपने दिला होता. या इशाऱ्यानंतर लगेचच भाजपने सोमवारी आंदोलन केले. या आंदोलनावर शिवसेना ठाकरेंच्या पक्षाने भाजपला सुनावलं आहे. भाजपने आपला नाकर्तेपणा झाकण्यासाठी छोट्या-छोट्या मुद्यांवरून राजकारण करायला सुरूवात केल्याचा टोला शिवसेना ठाकरे सेनेने लगावला आहे.

दरम्यान, भाजपने पेंग्विन पिलांच्या नावासंदर्भात शुक्रवारी राणीबाग प्रशासनास पत्र दिले. तोपर्यंत कार्यालय बंद झाले होते. यानंतर दोन दिवस सुटी होती. यामुळे या मागण्यांवर काहीही निर्णय घेता आला नाही. भाजपने यानंतर लगेचच आंदोलन केले. राजकीय पक्षाना आंदोलन करणे हा त्यांचा अधिकार आहे. पण निर्णय घ्यायला वेळ द्यायला हवा, असे राणीबागेतील एका वरिष्ठ अधिकाऱ्याने सांगितले.