BMC Khichdi Scam : शिंदे गटातील खासदाराचा मुलगा अडचणीत ? सोमय्यांच्या तक्रारीनंतर अमोल कीर्तीकरांची पाच तास चौकशी

Mumbai : कोरोना काळातील कथित खिचडी घोटाळ्यामध्ये शिंदे गटातील खासदार गजानन कीर्तीकर यांचे पुत्र अमोल यांची आर्थिक गुन्हे शाखेकडून काल (बुधवारी) सुमारे पाच तास चौकशी करण्यात आल्याची माहिती समोर येत आहे. शिवसेनेतील फुटीनंतर गजानन कीर्तीकर हे शिंदे गटात दाखल झाले आहेत, तर त्यांचे सुपुत्र अमोल हे ठाकरे गटात आहेत.

कोरोना काळात स्थलांतरित मजुरांना २५ लाख खिचडी पॅकेट पुरविण्यात गैरव्यवहार झाल्याची तक्रार भाजप नेते, माजी खासदार किरीट सोमय्या यांनी आर्थिक गुन्हे शाखेत केली आहे. या प्रकरणी आग्रीपाडा पोलिस ठाण्यात गुन्हा दाखल करण्यात आला आहे. सध्या या प्रकरणाची चौकशी सुरू आहे. यापूर्वी आर्थिक गुन्हे शाखेच्या पथकाने प्राथमिक चौकशीत‘ ईडी’ने अटक केलेले सुजित पाटकर यांचीही चौकशी केली आहे.

गेल्या काही दिवसांमध्ये आर्थिक गुन्हे शाखेच्या पथकाने या प्रकरणात अनेक जणांना चौकशीला बोलावले होते. काल (बुधवारी) अमोल यांची मुंबई पोलिसांच्या गुन्हे शाखेच्या पथकाने चौकशी केली. ते चौकशीसाठी मुंबई पोलीस आयुक्तालयात आले होते. कथित खिचडी घोटाळ्यामध्ये त्यांच्या सहभागाविषयी आर्थिक गुन्हे शाखेच्या अधिकाऱ्यांनी चौकशी केली.

किरीट सोमय्यांनी केली होती तक्रार

२५ लाख खिचडी पॅकेट पुरविण्यासाठी पालिकेकडून आठ कोटी रुपयांपेक्षा अधिक रक्कम मिळविण्यात आली आणि त्यातील चार कोटी रुपये बनावट कंपन्यांमध्ये वळविण्यात आल्याचा आरोप किरीट सोमय्या यांनी केला आहे. सुमारे साडेसहा कोटींचा हा गैरव्यवहार असल्याचे सोमय्यांनी आपल्या तक्रारीत म्हटलं आहे.

हे आहेत आरोपी...

सह्याद्री रिफ्रेशमेंट’चे राजीव साळुंखे, सुजित पाटकर, फोर्सवन मल्टी सर्व्हिसेसचे भागीदार व कर्मचारी, सुनील ऊर्फ बाळा कदम, ‘स्नेहा केटरर्स’चे भागीदार, नियोजन विभागाचे तत्कालीन सहायक आयुक्त, अन्य बीएमसी अधिकारी, काही व्यक्तींना या प्रकरणात आरोपी आहेत. अमोल यांना चौकशीसाठी पुन्हा बोलाविण्यात येणार असल्याचे पोलिस सूत्रांनी सांगितले.