राणे-नाईकांच्या भांडणात काँग्रेसला लॉटरी; दोन नगरसेवक अन् थेट मिळवलं नगराध्यक्षपद

सिंधुदुर्ग : कुडाळ (Kudal) नगरपंचायतीच्या नगराध्यक्षपदाच्या निवडणुकीत भाजप व शिवसेनेच्या भांडणात काँग्रेसची (Congress) चांदी झाली असून केवळ दोन नगरसेवक असतानाही पक्षाला नगराध्यक्षपद मिळालं आहे. केंद्रीय मंत्री नारायण राणे (Narayan Rane) आणि आमदार वैभव नाईक (Vaibhav Naik) यांच्यातील वादात काँग्रेसची लॉटरी लागल्याने राज्यभर त्याचीच चर्चा रंगली आहे.

कुडाळ ही नगरपंचायत (Nagar Panchayat Election) एका मताने भाजपच्या (BJP) हातून निसटली आहे. नगराध्यक्षपदी काँग्रेसचे आफ्रीन करोल यांची निवड झाली आहे. करोल यांना या निवडणुकीत नऊ तर भाजपच्या प्राजक्ता बांदेकर यांना आठ मतं मिळाली. कुडाळमध्ये एकूण 17 पैकी आठ जागांवर भाजपचे उमेदवार विजयी झाले होते. तर शिवसेनेला सात व काँग्रेसला दोन जागा मिळाल्या होत्या.

नगरपंचायतीवर सत्ता मिळवण्यासाठी नऊ आकडा कोणत्याच पक्षाला गाठता आला नाही. त्यामुळे काँग्रसेच्या दोन नगरसेवकांवरच शिवसेना (Shiv Sena) व भाजपचं गणित अवलंबून होतं. पण वैभव नाईक यांनी राणेंना सत्तेपासून दूर ठेवण्यासाठी दोन नगरसेवक असलेल्या काँग्रेसला नगराध्यक्षपदाची ऑफर दिली. त्यामुळं राज्यात सत्तेत असलेल्या महाविकास आघाडीतील हे दोन्ही पक्ष नगराध्यपदाच्या निवडणुकीत एकत्र आले.

निवडणुकीत अखेरच्या क्षणी चमत्काल घडेल, असा दावा भाजपकडून केला जात होता. पण महाविकास आघाडीच्या नगरसेवकांनी हा दावा फोल ठरवत भाजपच्या उमेदवाराचा पराभव केला. कुडाळ विधानसभा मतदारसंघ शिवसेनेच्या ताब्यात असून वैभव नाईक आमदार आहेत.

राणेंनी सिंधुदुर्ग बँकेत सत्ता मिळवल्यानंतर कुडाळ नगरपालिकेसाठीही राणे व नाईक यांच्यात जोरदार लढत होती. मागील निवडणुकीत भाजपला या नगरपंचायतीत नऊ जागा मिळाल्या होत्या. एकुण 17 जागा असलेल्या या नगरपालिकेत भाजपला पुन्हा हा जादुई आकडा गाठता आलेला नाही.