Eknath Shinde News: मराठी कुटुंबाचं दुकान हडपणाऱ्या वादग्रस्त नेत्यावर शिंदेंनी सोपवली शिवसेनेची मोठी जबाबदारी

Mumbai News: मार्च महिन्यात मराठी कुटुंबाच्या दुकान दमदाटी करुन बळकावणाऱ्या एकनाथ शिंदेंच्या शिवसेनेच्या लालसिंह राजपुरोहित यांच्यावर मोठी कारवाई करण्यात आली होती. उपमुख्यमंत्री एकनाथ शिंदे (Eknath Shinde) यांनी पक्षातून त्यांची हकालपट्टी करण्याचा आदेश काढला होता. यानंतर कांदिवली पोलिसांनी त्यांना अटक केली होती.आता याच लालसिंह राजपुरोहितवर शिंदेंनी शिवसेनेची मोठी जबाबदारी दिली आहे.

उपमुख्यमंत्री आणि शिवसेनेचे मुख्य नेते एकनाथ शिंदे यांनी लालसिंह राजपुरोहित यांची चारकोप व कांदिवली पूर्व विधानसभा क्षेत्रासाठी प्रभारी विभागप्रमुख पदी नियुक्ती करण्यात आली आहे. या नियुक्तीमुळे राजकारण तापण्याची शक्यता आहे.

एकीकडे आगामी मुंबई निवडणुकीत मराठीचा मुद्दा राज आणि उद्धव या दोन्ही ठाकरे बंधूंकडून तापवला जाण्याची शक्यता आहे. हाच मुद्दा महायुतीमधील भाजप,शिवसेनेला (Shivsena) अडचणीचा ठरण्याची शक्यता आहे. पण याचदरम्यान, शिंदेंनी बळजबरीनं एका मराठी कुटुंबाचं दुकान हडपणाऱ्या लालसिंह राजपुरोहितवर मोठी जबाबदारी दिल्यानं स्थानिक नेत्यांमध्ये मोठी नाराजी पसरली आहे.

प्रकरण काय?

कांदिवलीत एका ज्येष्ठ दांपत्याची फसवणूक करत दुकान हडपल्याप्रकरणी कांदिवली पोलीस ठाण्यात लालसिंह राजपुरोहित यांच्यावर गुन्हा दाखल करण्यात आला होता. त्यांना कांदिवली पोलिसांनी अटकही केली होती. त्यानंतर तातडीने पावलं उचलत उपमुख्यमंत्री एकनाथ शिंदे यांनी शिवसेनेचे मालाड कांदिवली आणि चारकोपचे विभागप्रमुख लालसिंह पुरोहित यांना पक्षातून निलंबित करण्याचा निर्णय घेतल्याचं जाहीर केलं होतं.

यापूर्वी लालसिंह राजपुरोहित आणि त्याच्या सहा कार्यकर्त्यांविरोधात पोलिसांनी 28 डिसेंबर रोजी ठेकेदाराकडून खंडणी मागितल्याप्रकरणी गुन्हा दाखल केला होता. कांदिवली पोलिसांनी खंडणी वसुलीच्या प्रकरणात शिवसेनेचे पदाधिकारी लालसिंह राजपुरोहित यांना अटक केली होती. त्यांच्यावर आणखी एका फसवणुकीच्या प्रकरणात गुन्हा दाखल करण्यात आला आहे.