Eknath Shinde vs Uddhav Thackeray : एकनाथ शिंदेंकडून ठाकरेंना पुन्हा मोठा धक्का; सर्वात विश्वासू आमदाराला फोडले, थेट उपसभापती पदासाठी भरला अर्ज

Shiv Sena political crisis : राज्याचे उपमुख्यमंत्री एकनाथ शिंदे यांनी उद्धव ठाकरे यांना पुन्हा एकदा मोठा धक्का दिला आहे. काही दिवसांपूर्वीच सहा खासदारांनी शिवसेनेत आणत त्यांनी ऑपरेशन टायगर यशस्वी करून दाखविले होते. त्यानंतर आमदारही शिवसेनेत प्रवेश करणार असल्याचे त्यांच्या नेत्यांकडून सांगितले जात होते. त्याची सुरूवात मंगळवारपासून झाली आहे.

मुंबईतील विधानपरिषदेचे आमदार आणि ठाकरेंचे विश्वासू नेते सचिन अहिर यांनी मंगळवारी शिवसेनेकडून विधानपरिषदेच्या उपसभापतीच्या निवडणुकीसाठी अर्ज दाखल केला आहे. ठाकरेंना हा मुंबईत मोठा झटका बसला आहे. अहिर यांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे, सुनेत्रा पवार आणि महायुतीतील अन्य नेत्यांच्या उपस्थित अर्ज दाखल केला.

एकनाथ शिंदे यांच्याकडून धक्कातंत्राचा वापर करण्यात आला आहे. विधानपरिषदेच्या उपसभापतीपदासाठी निवडणूक जाहीर झाल्यानंतर शिवसेनेतील काही नेत्यांची नावे चर्चेत होती. मात्र, मंगळवारी अचानक शिंदे यांनी सचिन अहिर यांना समोर आणत त्यांचा उमेदवारी अर्ज दाखल केला. त्यामुळे महाविकास आघाडीतील नेत्यांनाही जोरदार धक्का बसला आहे.

शिवसेनेचे नेते संजय शिरसाट यांनी सांगितले की, 'सचिन अहिर हे शिवसेनेचे आहेत, आता ते शिवसेनेतच आले आहेत.' त्यामुळे सचिन अहिर हे शिवसेनेत आले असल्याचे स्पष्ट झाले असून असून त्यांनी शिवसेनेचा उमेदवार म्हणूनच अर्ज दाखल केल्याचेही सांगितले जात आहे.

सचिन अहिर हे ठाकरे कुटुंबाचे विश्वासू नेते मानले जात होते. प्रामुख्याने मुंबईतील वरळी भागासह दलित मतदारांमध्ये अहिर यांचा दबदबा आहे. आता त्यांनीही ठाकरेंची साथ सोडली आहे. शिंदे यांच्याकडून ऑपरेशन टायगर सुरू असल्याचे स्पष्ट संकेत पुन्हा एकदा देण्यात आले आहेत. आता ठाकरेंचे विधानपरिषदेतील अन्य आमदार काय भूमिका घेणार, याबाबतही उत्सुकता वाढली आहे.