Eknath Shinde Politics : एकनाथ शिंदे उद्धव ठाकरेंचा मार्ग करणार मोकळा; 125 जागांच्या प्रस्तावाने भाजपची कोंडी?

Eknath Shinde News : एकनाथ शिंदेंची शिवसेना आणि भाजपमध्ये सर्वकाही सुरळीत नसल्याचे चित्र आहे. शिंदेंनी काही दिवसांपूर्वी दिल्लीत गृहमंत्री अमित शाह यांची भेट घेत आपली नाराजी व्यक्त केली. दरम्यान, मुंबई महापालिकेसाठी तयारी करत असलेल्या भाजपला मोठा धक्का देण्याच्या तयारीत एकनाथ शिंदे असल्याची चर्चा आहे.

मुंबई महापालिकेत शिंदेंची शिवसेना 125 जागांवर लढण्यासाठी आग्रही आहेत. साम टिव्हीने सुत्रांच्या हवाल्याने दिलेल्या वृत्तानुसार शिवसेना भाजपला 125 जागांवर लढण्याचा प्रस्ताव पाठवणार आहे. उद्धव ठाकरेंसोबत असलेले अनेक माजी नगरसेवकांनी शिंदेंच्या शिवसेनेत प्रवेश केल्याने शिंदेंची बाजु मजबूत झाल्याचे शिंदे गटातील नेते सांगत आहेत.

दरम्यान, भाजप शिंदेंच्या 125 जागांचा प्रस्ताव स्वीकारण्याची शक्यता फार कमी आहे. त्यामुळे शिंदेंची शिवसेना स्वबळावर लढली तर उद्धव ठाकरे यांना मुंबई महापालिका जिंकण्याचा मार्ग मोकळा होईल, अशी शक्यता देखील वर्तवली जात आहे.

शिंदेंच्या शिवसेनेमुळे मराठी मते फुटण्याची भीती व्यक्त केली जात आहे. जर शिंदेंना भाजपची मदत मिळाली तर ते उद्धव ठाकरेंना टक्कर देऊ शकतील त्यामुळे शिंदे स्वबळावर लढणे हे ठाकरेंसाठी फायद्याचे ठरणार आहे.

ठाकरे बंधूंची युती निश्चित

भाजप-शिंदेंच्या शिवसेनेची युती होणार की नाही याचे चित्र अजून स्पष्ट नाही. मात्र, उद्धव ठारकेंची शिवसेना आणि राज ठाकरेंची मनसे यांची युती निश्चित मानली जात आहे. ठाकरे बंधू एकत्र निवडणूक लढून भाजपला टक्कर देण्यासाठी सज्ज आहे.

स्वबळावर भाजप सत्तेच्या जवळ?

भाजपच्या अंतर्गत सर्व्हेनुसार स्वबळावर ते 100 जागा जिंकत आहेत. मागील महापालिकेत भाजपचे 82 नगरसेवक होते. त्यामुळे आणखी ताकद लावून भाजप स्वबळावर लढण्याची शक्यता वर्तवली जात आहे. शिंदेंना मुंबईत मोठे यश मिळण्याची शक्यता कमी आहे. त्यामुळे भाजप त्यांना अवघ्या 50 ते 60 जागा देण्याची शक्यता वर्तवली जात आहे. मराठी भाषिक भागांमध्ये ठाकरेंना रोखण्यासाठी भाजप ही खेळी खेळण्याची शक्यता आहे.