Jayant Patil ED Enquiry News : ईडी चौकशीला सामोरे जाताना जयंत पाटलांना अनुभवी लोकांनी दिला 'हा' सल्ला...

ED inquiry of Jayant Patil : आयएल अॅण्ड एफएस कोट्यावधी रुपयांचा गैरव्यवहार व संशयास्पद कर्जाचे वाटप केल्याप्रकरणी राष्ट्रवादी काँग्रेसचे प्रदेशाध्यक्ष (NCP) जयंत पाटील यांना ईडीने समन्स पाठवले होते. त्यानुसार जयंत पाटील आज सकाळी 11 वाजता ईडी कार्यालयात हजर झाले.

ईडी (ED) कार्यालयात हजर होण्यापूर्वी पाटील यांनी माध्यमांशी संवाध साधला. त्यावेळी जयंत पाटील म्हणाले, ईडीने बोलावले म्हटल्यानंतर जाऊन त्यांच्या सगळ्या प्रश्नांची उत्तर देणार आहे. आयएल अॅण्ड एफएसच्या संबंधीत माझा कुणाशीही कधीही संपर्क आलेला नाही. माझा या कंपन्यांशी काहीही संबंध नाही, असे पाटील यांनी यावेळी स्पष्ट केले.

माझ्याकडे काही नाही, मी दोन पुस्तकं वाचायला घेऊन चाललो आहे, असे पाटील यांनी सांगितले होते. पुस्तकं घेऊन चालला आहात म्हणजे तुम्ही मुक्कामाच्या दृष्टीने चालला आहात का? असा प्रश्न जयंत पाटील यांना विचारला असता ते म्हणाले, ते जेव्हा-जेव्हा प्रश्न विचारतात तेव्हा उत्तर द्यायची असतात, असे मला अनुभवी लोकांकडून सांगण्यात आले. आज माला माझे कुणाशीही बोलणे झाले नाही, असेही पाटील यांनी यावेळी सांगितले.

दरम्यान, जयंत पाटील (Jayant Patil) ईडी कार्यालयात दाखल झाल्यानंतर राज्यभरात राष्ट्रवादीच्या वतीने आंदोलन केले जात आहे. इस्लामपूरचे राष्ट्रवादीचे कार्यकर्ते मुंबईत दाखल झाले आहेत. त्यांनी राष्ट्रवादीच्या प्रदेश कार्यालयाबाहेर ईडी आणि भाजापविरोधात आंदोलन केले. पाटलांच्या नावाने घोषणाबाजी करण्यात येत असून त्यांच्या मुंबईतील घराबाहेर बॅनरबाजीही करण्यात आली आहे. राज्यभरात राष्ट्रवादी काँग्रेसच्या वतीने ईडीच्या विरोधात आंदोलन करण्यात येत आहे.