Mahayuti Government Account Allocation : अजितदादांना 'अर्थ' दिले, मग आम्हाला 'गृह' का नाही? महायुतीमधील तिढ्यामुळे खातेवाटप लांबणीवर

Mumbai News : महायुती सरकारच्या मंत्रिमंडळाचा शपथविधी झाला. आता लक्ष लागले आहे, ते खातेवाटपाकडे. महायुतीमधील शिवसेना गृह खात्यावर अजूनही अडून बसलेल्याचे समोर आले आहे.

त्यातून मंत्रिमंडळाचे खाटेवाटप रखडले असून, त्याचा मुहूर्त अधिवेशन संपल्यानंतर लागेल, असे सांगितले जात आहे.

उपमुख्यमंत्री अजित पवार (Ajit Pawar) यांना अर्थ खाते मिळू शकते, तर आम्हाला गृह खाते का देत नाही? असा सवाल महायुतीतील शिवसेनेकडून केला जात आहे. शिवसेनेच्या या भूमिकेमुळे महायुतीमधील प्रमुख भाजपची कोंडी झाली असून खातेवाटपाचा तिढा अधिकच क्लिष्ट झाला आहे.

नागपूर (Nagpur) हिवाळी अधिवेशनाचा आज शेवटचा दिवस आहे. अजूनही खातेवाटप झालेले नाही. अधिवेशनानंतर मतदारसंघात मागे जात असलेल्या मंत्र्यांना बिनखात्याचे मंत्री म्हणून जावे लागणार आहे. यामुळे शपथ घेतलेल्या मंत्र्यांमध्ये देखील नाराजी आहे. खातेवाटप कधी होणार, यावर हे मंत्री देखील आता वरिष्ठांकडे बोट दाखवत आहेत.

खातेवाटपाचा वाढलेला तिढा यामुळे महायुतीत सर्वकाही आलबेल नाही, हे स्पष्ट होत आहे. आठ दिवसापूर्वी मंत्रिमंडळाचा विस्तार आणि संबंधित मंत्र्यांचा शपथविधी झाला. महायुतीमधील मंत्र्यांच्या संख्या देखील ठरली. परंतु एकमत होऊ शकले नसल्याने खातेवाटप लांबणीवर पडले आहे.

बैठक 20 मिनिटांत गुंडाळली...

महायुतीमधील शिवसेनेला गृह खाते हवे आहे. परंतु भाजप शिवसेनेला गृहखाते देण्यास इच्छुक नाही. यातून खातेवाटपाचा पेच कायम आहे. मंत्र्यांकडे कोणतेच खाते नसल्याने काल महायुतीच्या मंत्रिमंडळाची बैठक अवघ्या 20 मिनिटात उरकली.

नाराजी टाळण्यासाठी खातेवाटप लांबणीवर...

महायुतीमधील खातेवाटप लांबणीवर पडल्याचे दोन कारण समोर येत आहेत. यात मंत्रिमंडळाच्या शपथविधीनंतर उमटलेली नाराजी आणि ती नाराजी अधिक उफाळून येऊ नये, यासाठी महायुतीच्या वरिष्ठांकडून घेतली जात असलेली काळजी. खातेवाटप केल्यास आपल्याच पक्षातील नेत्यांच्या नाराजी समोरे जाणे टाळणे, ही महायुतीमधील वरिष्ठ नेत्यांची रणनीती असल्याचे सांगितले जात आहे.