राऊतसाहेब हिशेब द्या; अन्यथा मी तुमचा हिशेब करेन : किरीट सोमय्यांचा निर्वाणीचा इशारा

मुंबई : शिवसेनेचे खासदार संजय राऊत (Sanjay Raut) हे काय-काय उद्योग करतात, हे आता जनतेपुढे यायला सुरुवात झाली आहे. ज्या प्रवीण राऊत यांनी पीएमसी बॅंकेतून १ हजार ९७ कोटी रुपये ढापले, त्या प्रवीण राऊत यांचे आपले संबंध काय आहेत. आतली गोष्ट काय आहे, हे राज्यातील जनतेला एकदा कळू द्या. तुमचे उद्योगधंदे लोकांना उद्यापर्यंत सांगा; अन्यथा मी सांगेल. हिसाब द्या; अन्यथा हिसाब होगा, असा निर्वाणीचा इशारा भारतीय जनता पक्षाचे माजी खासदार किरीट सोमय्या (Kirit Somaiya) यांनी संजय राऊत यांना दिला आहे. (Kirit Somaiya's allegations against Sanjay Raut)

प्रवीण राऊत हे शिवसेनेचे खासदार संजय राऊत यांचे निकटवर्तीय समजले जातात. त्यांना बुधवारी पत्राचाळ जमीन घोटाळ्याप्रकरणी सक्त वसुली संचालनालयाने अटक केली आहे. याच प्रकरणात ईडीने राऊतांच्या दोन्ही मुलींच्या कंपनीत भागीदार असलेल्या सुजित पाटकर यांच्या घरावरही छापा टाकला आहे, त्याअनुषंगाने सोमय्यांनी राऊत यांना सवाल केला आहे.

सोमय्या यांनी सांगितले की ईडीकडून अटक करण्यात आलेल्या प्रवीण राऊत यांच्या पत्नी माधुरी राऊत आणि संजय राऊत यांची पत्नी वर्षा राऊत यांची भागीदारीमध्ये कन्स्ट्रक्शन कंपनी आहे. याच प्रवीण राऊत यांनी पीएमसी बॅंकेतून १ हजार ९७ कोटी रुपये ढापले आहेत. राऊतांच्या पत्नीने माधुरी राऊतसोबतच का भागीदारी केली? तुम्ही तर सांगता की आपली पत्नी शिक्षिका आहे. पण, आतली गोष्ट काय आहे, हे एकदा जनतेला कळू द्या, असेही सोमय्या म्हणाले.

प्रवीण राऊत आणि कंपनी आपल्याला कशी मदत करते, हे लोकांना कळू द्या. आतली गोष्ट काय आहे? कोणा कोणाला काय काय मिळालं आहे. आपल्याला अलिबागची जागा मिळाली की दादरचा फ्लॅट मिळाला?, हेही एकदा सांगून टाका, असे आव्हान सोमय्या यांनी राऊतांना दिले.

सुजीत पाटकर यांच्यावर ईडीकडून पडलेल्या छाप्यासंदर्भात बोलताना किरीट सोमय्या यांनी पुन्हा राऊतांवर निशाणा साधला. विदिता संजय राऊत, पूर्वशी संजय राऊत आणि सुजित मुकुंद पाटकर हे कोण आहेत? प्रवीण राऊत याने २०१० मध्ये आपली मदत केली होती. त्यातून आपण २०१० मध्ये अलिबागमधली जागा घेतली, त्यातले ५५ लाख रुपये ईडीला परत केले. सुजित पाटकर आणि राऊतांचा संबंध काय? असा सवालही सोमय्या यांनी संजय राऊतांना विचारला.

संजय राऊत यांनी आपले उद्योगधंदे लोकांना उद्यापर्यंत सांगावे; अन्यथा मी सांगेल. तुमचे उद्योगधंदे आणि पैसे याबाबत हिशेब द्या, नाहीतर मी उद्या हिशेब करतो. चने, फुटाणे आणि ढोकळा वगैरे बोलून विषयांतर करु नका. राऊत परिवाराच्या उद्योगधंद्यांसंबधी शनिवारी (ता. ४ फेब्रुवारी) दुपारी ४ वाजता पुणे येथील शिवाजीनगर पोलिस ठाण्यात एफआयआर दाखल करणार आहे, असेही सोमय्यांनी स्पष्ट केले आहे.