अनंत गीतेंनी घेतली बंडखोर शिवसेना नगरसेवकांची भेट : लवकरच भूमिका स्पष्ट करणार!

मंडणगड : नगरसेवक म्हणून निवडून आल्यानंतर कोणीही अभिनंदन करायला आले नाही; मात्र मी आलो असे म्हणत माजी खासदार अनंत गीते (Anant Gite) यांनी मंडणगड नगरपंचायतीमध्ये निवडून आलेल्या शहरविकास आघाडीप्रणित अपक्ष उमेदवारांचे अभिनंदन करत त्यांना शुभेच्छा दिल्या. तसेच जर माझी प्रचाराची सभा झाली असती, तर मंडणगड नगरपंचायतीच्या निकालाचे चित्र बदलले असते, असे गीते यांनी भेटीप्रसंगी सांगितले. त्यामुळे नगरपंचायत निवडणुकीच्या पार्श्वभूमीवर करण्यात आलेली आघाडी, शिवसेनेतील (shivsena) नेतृत्वबदल गीते यांना पटलेला नसल्याचे त्यांच्या बोलण्यावरून दिसते. (Anant Gite meets rebel Shiv Sena corporators : will clarify role soon!)

शिवसेना नेते अनंत गिते हे मंडणगड तालुक्यात खासगी दौऱ्यावर आले असताना त्यांनी नवनिर्वाचित नगरसेवक मुस्ताक दाभिळकर यांच्या निवासस्थानी नगरपंचायतमध्ये निवडून आलेल्या शहर विकास आघाडीच्या सर्व नगरसेवकांची भेट घेतली. या वेळी पक्षातील कार्यकर्त्यांनी आपल्या भावना व्यक्त करताना निवडणुकीत शिवसेना पक्षाकडून व पक्षातील ज्येष्ठ नेत्यांकडून आपल्याला डावलून आपल्यावर अन्याय केल्याचे सांगत आपल्या मनातील खदखद व्यक्त केली.

यावर गीते यांनी सूचक बोलताना आज फक्त आपले सर्वांचे अभिनंदन करण्यासाठी आलो आहे. लवकरच भूमिका घेणार असल्याचे सांगितले. तसेच मंडणगड नगरपंचायतीच्या निवडणुकीत प्रचाराच्या वेळी मी दिलेल्या तारखेला जर सभा घेतली असती तर या निवडणुकीच्या निकालाचे चित्र वेगळे दिसून आले असते, असे सांगत गीते यांनी नगरपंचायत प्रचाराच्या वेळी सभेसाठी वेळ दिला होता. या चर्चेवर शिक्कामोर्तब केले.

राजकीय वर्तुळात नव्याने चर्चा सुरू

अनंत गीते यांनी आज शिवसेना पक्षाशी बंडखोरी करत नगरपंचायतीमध्ये अपक्ष निवडणूक लढवलेल्या आणि अपक्ष म्हणून निवडून आलेल्या नगरसेवकांची भेट घेतल्याने राजकीय वर्तुळात नव्याने चर्चा सुरू झाली आहे. तालुक्याचे राजकारण वेगळ्या दिशेने जाणार असल्याचे बोलले जात आहे. या भेटीप्रसंगी माजी तालुकाप्रमुख प्रताप घोसाळकर, अनंत लाखण, स्नेहल सकपाळ, विनोद जाधव, चेतन सातोपे, दीपक मालुसरे, इरफान बुरोंडकर, विश्वनाथ सावंत, संजय शेडगे, राजेश भवणे, अमिता शिंदे, समीक्षा लोखंडे, अहमद मुकादम, किशोर दळवी, नीलेश गोवळे, संतोष पार्टे उपस्थित होते.